મુંબઈ: મહારાષ્ટ્રના રાજકારણમાં ફરી એકવાર નવો વિવાદ ઊભો થયો છે. કોંગ્રેસ નેતા સોનિયા ગાંધીના પુસ્તકના વિરોધ દરમિયાન એકનાથ શિંદે જૂથની શિવસેનાનાં નેતા શાયના એનસી દ્વારા શિવસેનાના સ્થાપક બાળાસાહેબ ઠાકરેનો ફોટો ફાડી નાખવામાં આવતાં રાજકીય ગરમાવો જોવા મળી રહ્યો છે. જોકે, શાયના એનસીએ આ ઘટનાને અજાણતાં થયેલી ભૂલ ગણાવી છે.
મળતી માહિતી મુજબ, બુધવારે મુંબઈમાં સોનિયા ગાંધીના પુસ્તકના વિવાદાસ્પદ પાનાઓના વિરોધમાં પ્રદર્શન યોજાયું હતું. આ પ્રદર્શનમાં શાયના એનસી ઉપરાંત સંજય નિરુપમ અને આનંદ દુબે સહિતના પક્ષીય નેતાઓ પણ ઉપસ્થિત રહ્યા હતા.
પ્રદર્શન દરમિયાન એક તસવીર ફાડવામાં આવી રહી હતી, જેમાં બાળાસાહેબ ઠાકરે મણિશંકર અય્યરના પુતળાને ચપ્પલ મારતા જોવા મળતા હતા. જોકે, તસવીર ફાડવાની પ્રક્રિયા દરમિયાન અફરાતફરીમાં બાળાસાહેબ ઠાકરેનો ચહેરો પણ ફાટી ગયો હતો. આ બાબત ધ્યાનમાં આવતાં જ ઘટનાએ રાજકીય વિવાદનું સ્વરૂપ ધારણ કર્યું હતું.
ઘટનાને પગલે ઉદ્ધવ ઠાકરે જૂથની શિવસેના અને કોંગ્રેસના નેતાઓએ વિરોધ નોંધાવ્યો હતો. મુંબઈ મહાનગરપાલિકા (BMC) મુખ્યાલય ખાતે વિરોધ પ્રદર્શન કરી શાયના એનસી વિરુદ્ધ સૂત્રોચ્ચાર કરવામાં આવ્યા હતા. સાથે જ તેમને પક્ષમાંથી હાંકી કાઢવાની માંગ પણ કરવામાં આવી હતી.
બીજી તરફ, શાયના એનસીએ સ્પષ્ટતા કરતાં જણાવ્યું હતું કે બાળાસાહેબ ઠાકરેનું અપમાન કરવાનો તેમનો કોઈ ઇરાદો નહોતો. વિરોધ પ્રદર્શન દરમિયાન અજાણતાં આ ભૂલ થઈ હતી. શિંદે જૂથના અન્ય નેતાઓએ પણ આ મુદ્દે વિપક્ષ દ્વારા રાજકીય લાભ લેવાનો પ્રયાસ થઈ રહ્યો હોવાનો આક્ષેપ કર્યો હતો.
આ ઘટનાને પગલે મહારાષ્ટ્રમાં શિવસેનાના બંને જૂથો વચ્ચે રાજકીય નિવેદનબાજી તેજ બની છે. બાળાસાહેબ ઠાકરેના ફોટાને લઈને સર્જાયેલા આ વિવાદમાં આગામી દિવસોમાં રાજકીય પ્રતિક્રિયાઓ વધુ સામે આવે તેવી શક્યતા છે.
