બંગાળની ખાડીમાં વધુ એક વાવાઝોડાની શક્યતાને પગલે હવામાન વિભાગ સતર્ક બન્યું છે. ચક્રવાતી તોફાન ‘અર્નબ’ની અસર સંપૂર્ણપણે શમી નથી ત્યાં જ સમુદ્રમાં નવી હવામાન પ્રણાલી સક્રિય થઈ છે. આગામી 24 કલાકમાં આ સિસ્ટમ વધુ મજબૂત બની શકે છે અને રવિવાર સુધીમાં ચક્રવાતી તોફાનનું સ્વરૂપ ધારણ કરે તેવી શક્યતા છે. આ સિસ્ટમને ‘મુરસુ’ નામ આપવામાં આવી શકે છે.
હવામાન વિભાગના જણાવ્યા અનુસાર, નવી સિસ્ટમ પશ્ચિમ-ઉત્તરપશ્ચિમ દિશામાં આગળ વધી રહી છે અને 2 નવેમ્બરની સાંજ સુધીમાં આંધ્રપ્રદેશના દરિયાકાંઠે પહોંચવાની શક્યતા છે. હાલમાં બંગાળની ખાડીમાં પવનની ગતિ 65થી 75 કિલોમીટર પ્રતિ કલાક છે, જ્યારે પવનના ઝાપટાની ગતિ 85 કિલોમીટર પ્રતિ કલાક સુધી પહોંચી શકે છે.
દેશના અનેક રાજ્યોમાં વરસાદ અને ભારે પવનની આગાહી
નવી હવામાન પ્રણાલીની અસર દેશના વિવિધ ભાગોમાં જોવા મળી શકે છે. હવામાન વિભાગે 1 નવેમ્બરે અરુણાચલ પ્રદેશ અને આંધ્રપ્રદેશના દરિયાકાંઠાના વિસ્તારોમાં ભારે વરસાદની શક્યતા વ્યક્ત કરી છે. કેરળ અને માહેમાં પણ ભારે વરસાદની આગાહી છે.
ઓડિશામાં વીજળી પડવાની અને તેજ પવન ફૂંકાવાની ચેતવણી આપવામાં આવી છે. ઉત્તરાખંડના કેટલાક વિસ્તારોમાં કરા પડવાની શક્યતા છે, જ્યારે ઉત્તર પ્રદેશ અને બિહારના કેટલાક વિસ્તારોમાં હળવાથી મધ્યમ વરસાદ થઈ શકે છે.
ગુજરાત માટે આગામી 6 દિવસની હવામાન આગાહી
ગુજરાતના લોકો માટે રાહતના સમાચાર છે. હવામાન વિભાગની આગાહી પ્રમાણે 1થી 6 નવેમ્બર દરમિયાન રાજ્યમાં ક્યાંય વરસાદ પડવાની શક્યતા નથી. સમગ્ર ગુજરાતમાં હવામાન મુખ્યત્વે શુષ્ક રહેવાની આગાહી છે.
જોકે, રાજ્યના તાપમાનમાં ફેરફાર જોવા મળી શકે છે. આગામી 24 કલાક દરમિયાન મહત્તમ તાપમાનમાં ખાસ ફેરફાર થવાની શક્યતા નથી. ત્યારબાદના ત્રણ દિવસમાં મહત્તમ તાપમાનમાં ધીમે ધીમે 2થી 3 ડિગ્રી સેલ્સિયસનો વધારો થઈ શકે છે. બીજી તરફ, લઘુત્તમ તાપમાન આગામી સાત દિવસ સુધી લગભગ યથાવત્ રહેવાની શક્યતા છે.
સૌરાષ્ટ્ર સહિત અનેક વિસ્તારોમાં કમોસમી વરસાદ
રાજ્યમાં આગામી દિવસોમાં વરસાદની શક્યતા ન હોવા છતાં તાજેતરમાં સૌરાષ્ટ્ર અને અન્ય વિસ્તારોમાં કમોસમી વરસાદ નોંધાયો છે. રાજકોટ, પોરબંદર, ગીર સોમનાથ અને અમરેલી જિલ્લાના કેટલાક વિસ્તારોમાં વાતાવરણમાં પલટો આવ્યો હતો.
રાજકોટ જિલ્લાના ગોંડલ, ધોરાજી, જેતપુર અને જામકંડોરણામાં માવઠું થયું હતું. પોરબંદરના કેટલાક વિસ્તારોમાં પણ વરસાદ નોંધાયો હતો. અમરેલી જિલ્લાના બગસરા શહેર અને ગ્રામ્ય વિસ્તારો ઉપરાંત બગસરા તથા ખાંભા તાલુકામાં કમોસમી વરસાદ પડ્યો હતો.
આ ઉપરાંત જૂનાગઢ જિલ્લાના ભેંસાણ, સાબરકાંઠાના વડાલી, ગીર સોમનાથ અને અંબાજી વિસ્તારમાં પણ વરસાદ નોંધાયો હતો.
ખેડૂતો માટે મહત્વપૂર્ણ સૂચના
સૌરાષ્ટ્ર સહિત રાજ્યના કેટલાક વિસ્તારોમાં થયેલા કમોસમી વરસાદને કારણે ખેડૂતોમાં ચિંતા જોવા મળી રહી છે. જોકે, હવામાન વિભાગની આગાહી મુજબ આગામી છ દિવસ ગુજરાતમાં વરસાદની શક્યતા નથી. તેમ છતાં ખેડૂતોને સ્થાનિક હવામાનની સ્થિતિ અને સત્તાવાર આગાહીને ધ્યાનમાં રાખીને ખેતી સંબંધિત કામગીરી કરવી હિતાવહ છે.
