ટ્વિટરની ચકલી ઉડી ગઈ, એલન મસ્કએ કંપનીને આપ્યું નવું નામ, જાણો શું છે આ સમગ્ર મામલો

જ્યારથી એલન મસ્ક ટ્વિટરના માલિક બન્યા છે, ત્યારથી તેઓ આ પ્લેટફોર્મમાં નવા પ્રયોગો કરી રહ્યા છે. હવે તેઓએ ટ્વિટરની ઓળખ જ બદલી નાખવાનો નિર્ણય લીધો છે. મસ્કે ટ્વિટર પર અત્યાર સુધીનો સૌથી મોટો ફેરફાર કર્યો છે. તેણે ટ્વિટરને એક્સ તરીકે નવી ઓળખ આપી છે. હવે તમારે ટ્વિટર પર જવા માટે સર્ચ એન્જિનમાં Twitter.com દાખલ કરવાની જરૂર રહેશે નહીં, પરંતુ જો તમે X.com લખશો તો તમે સીધા ટ્વિટરના પેજ પર પહોંચી જશો. એટલે કે, ટ્વિટર હવે Twitter.com નથી રહ્યું, પરંતુ તે હવે X.com તરીકે ઓળખાશે.

તમને જણાવી દઈએ કે 24 કલાકથી પણ ઓછો સમય થયો છે જ્યારે એલન મસ્કએ જાહેરાત કરી હતી કે ટ્વિટરનો લોગો X થી બદલી દેવામાં આવશે. લોગો બદલવાની જાણકારી ખુદ એલન મસ્કે એક ટ્વીટ દ્વારા આપી હતી. નવા લોગો સાથે, તેઓએ ટ્વિટર બ્રાન્ડને ખતમ કરવાની યોજના તૈયાર કરી છે. તેણે પોતાના ટ્વીટમાં લખ્યું – અમે ટૂંક સમયમાં ટ્વિટર બ્રાન્ડને અને ધીમે ધીમે આ પ્લેટફોર્મ પરના તમામ પક્ષીઓને અલવિદા કહી દઈશું. આ નિર્ણય બાદ એલન મસ્ક ફરી સોશિયલ મીડિયા પર છવાઈ ગયા છે.

Twitter માટે નવું URL

ટ્વિટરના નવા લોગો, નવા નામની સાથે હવે એલોન મસ્કે તેના માટે એક નવું URL પણ રજૂ કર્યું છે. જો તમે Twitter માટે X.com લખો છો, તો તમે સીધા ટ્વિટરના સત્તાવાર પેજ પર પહોંચી જશો. જણાવી દઈએ કે આ કોઈ નવો નિર્ણય નથી. આ વાત ત્યારે જ સ્પષ્ટ કરી દીધી હતી જ્યારે તેમણે ટ્વિટર ખરીદ્યું હતું. તેમણે કહ્યું હતું કે Xની શરૂઆતમાં ટ્વિટર ખરીદવું એ સૌથી મોટું પગલું હશે.

તમને જણાવી દઈએ કે થોડા દિવસો પહેલા જ એલન મસ્કે ટ્વિટર પર એક વધુ ફેરફાર કર્યો હતો. જોકે આ ફેરફાર યુઝર્સ માટે હતો. તેઓએ હવે DM એટલે કે ટ્વીટર પર ડાયરેક્ટ મેસેજિંગ માટે પણ મર્યાદા નક્કી કરી છે. અનવેરિફાઇડ યુઝર્સ હવે ફક્ત લિમિટેડ DM જ કરી શકશે.