ગુલવીર સિંહે એશિયન એથ્લેટિક્સ ચેમ્પિયનશિપના પ્રથમ દિવસે પુરુષોની 10,000 મીટર દોડમાં ટોચનું સ્થાન મેળવીને ભારતને ટુર્નામેન્ટનો પ્રથમ ગોલ્ડ મેડલ અપાવ્યો હતો.
એશિયન ગેમ્સના બ્રોન્ઝ મેડલ વિજેતા 26 વર્ષીય ગુલવીરે 28 મિનિટ 38.63 સેકન્ડનો સમય લઇને ગોલ્ડ મેડલ જીત્યો હતો. તેનો રાષ્ટ્રીય રેકોર્ડ 27:00.22 સેકન્ડનો છે, જે તેણે આ વર્ષની શરૂઆતમાં બનાવ્યો હતો. જાપાનના મેબુકી સુઝુકી (28:43.84) એ સિલ્વર મેડલ જીત્યો હતો, જ્યારે બહેરીનના આલ્બર્ટ કિબિચી રોપે (28:46.82) એ બ્રોન્ઝ મેડલ જીત્યો હતો.
તે સિવાય સર્વિન સેબેસ્ટિયનએ પુરુષોની 20 કિમી વોક ઇવેન્ટમાં 1 કલાક 21 મિનિટ અને 13.60 સેકન્ડ (1:21:13.60)ના સમય સાથે બ્રોન્ઝ મેડલ જીતીને સ્પર્ધામાં ભારતનું ખાતું ખોલાવ્યું હતું. ચીનના વાંગ ઝાઓઝાઓ (1:20:36.90) અને જાપાનના કેન્ટો યોશિકાવા (1:20:44.90)એ અનુક્રમે ગોલ્ડ અને સિલ્વર મેડલ જીત્યો હતો.
