ડિજિટલ પેમેન્ટ્સના યુગમાં UPI (યુનિફાઇડ પેમેન્ટ્સ ઇન્ટરફેસ) એ ભારતમાં ક્રાંતિ લાવી છે, અને હવે તે વધુ સુરક્ષિત અને સુવિધાજનક બનવા જઈ રહ્યું છે! નેશનલ પેમેન્ટ્સ કોર્પોરેશન ઓફ ઇન્ડિયા (NPCI) ટૂંક સમયમાં UPI માં બાયોમેટ્રિક પ્રમાણીકરણ (Biometric Authentication) ની સુવિધા ઉમેરશે. આ નવી સુવિધા હેઠળ, UPI વપરાશકર્તાઓએ હવે દર વખતે વ્યવહારો માટે PIN દાખલ કરવાને બદલે, પોતાના ફેસ ID અથવા ફિંગરપ્રિન્ટ નો ઉપયોગ કરીને ચુકવણીઓને પ્રમાણિત કરી શકશે.
કેવી રીતે કામ કરશે આ નવી સિસ્ટમ અને તેના ફાયદા?
આ નવી સુવિધા હાલમાં સમીક્ષા તબક્કામાં છે અને તેને અમલમાં મૂકતા પહેલા રિઝર્વ બેંક ઓફ ઇન્ડિયા (RBI) અને અન્ય નિયમનકારોની મંજૂરીની જરૂર પડશે. 2025 ગ્લોબલ ફિનટેક ફેસ્ટમાં તેનંર પ્રદર્શન થવાની અપેક્ષા છે.
સૂત્રોના જણાવ્યા અનુસાર, NPCI છેલ્લા એક વર્ષથી આ ટેકનોલોજી પર કામ કરી રહ્યું છે અને UPI ઇકોસિસ્ટમના ભાગીદારો સાથે પરીક્ષણ અને પ્રતિસાદ શેર કરી રહ્યું છે.
• પ્રથમ પ્રાધાન્યતા ફેસ ID ને: જો વપરાશકર્તાના ઉપકરણ પર ફેસ ID (ચહેરાની ઓળખ) સુવિધા સક્રિય હશે, તો તેને પ્રથમ પ્રાથમિકતા આપવામાં આવશે.
• સુરક્ષિત પ્રક્રિયા: શરૂઆતમાં, આ સિસ્ટમ વપરાશકર્તાના ફોનમાં હાજર બાયોમેટ્રિક ડેટાનો ઉપયોગ કરશે. તે એક એન્ક્રિપ્ટેડ કી જનરેટ કરશે અને તેને મોકલનાર બેંકને મોકલશે. જ્યારે બેંક આ કીને માન્ય માનશે ત્યારે જ વ્યવહાર પૂર્ણ થશે.
નિષ્ણાતો માને છે કે આ નવી સિસ્ટમ OTP (વન-ટાઇમ પાસવર્ડ) અને PIN કરતાં ઘણી વધુ સુરક્ષિત હશે અને છેતરપિંડીની શક્યતા પણ નોંધપાત્ર રીતે ઓછી થશે.
અમલીકરણ અને ભવિષ્યની સંભાવનાઓ
જોકે આ સુવિધા હજુ પ્રારંભિક તબક્કામાં છે, શરૂઆતમાં બાયોમેટ્રિક ચુકવણી માટે ટ્રાન્ઝેક્શન રકમ પર મર્યાદા નક્કી કરી શકાય છે. તે પણ જોવામાં આવશે કે ફોનપે (PhonePe), ગૂગલ પે (Google Pay), પેટીએમ (Paytm), ભીમ (BHIM) જેવી વિવિધ UPI એપ્લિકેશનો માટે તેને અલગથી સેટ કરવી પડશે કે નહીં.
આ પરિવર્તન UPI વ્યવહારોને વધુ સરળ, ઝડપી અને સુરક્ષિત બનાવશે, જેનાથી લાખો ભારતીય વપરાશકર્તાઓને સીધો ફાયદો થશે. શું તમે આ નવી સુવિધાનો ઉપયોગ કરવા માટે ઉત્સાહિત છો?
