નર્મદા: મહિલા અને બાળ વિકાસ વિભાગ, ગુજરાત સરકાર તથા જિલ્લા વહીવટી તંત્રના સંયુક્ત ઉપક્રમે ‘પોષણ ઉત્સવ–2026’ અંતર્ગત પૌષ્ટિક વાનગી સ્પર્ધાનું આયોજન કરવામાં આવ્યું હતું. સ્પર્ધામાં બહેનો દ્વારા તૈયાર કરવામાં આવેલી વિવિધ પૌષ્ટિક અને સ્વાદિષ્ટ વાનગીઓ રજૂ કરવામાં આવી હતી.
આ પ્રસંગે નાંદોદ વિધાનસભાના ધારાસભ્ય ડૉ. દર્શના ચંદુભાઈ દેશમુખ ઉપસ્થિત રહ્યા હતા અને સ્પર્ધામાં રજૂ કરવામાં આવેલી વિવિધ વાનગીઓનું નિરીક્ષણ કર્યું હતું. બહેનો દ્વારા સ્થાનિક અને પરંપરાગત સામગ્રીનો ઉપયોગ કરીને તૈયાર કરવામાં આવેલી વિવિધ પૌષ્ટિક વાનગીઓ નિહાળી તેમણે તેમની સર્જનાત્મકતા અને પોષણ પ્રત્યેની જાગૃતિની પ્રશંસા કરી હતી.
‘પોષણ ઉત્સવ–2026’ અંતર્ગત યોજાયેલી આ સ્પર્ધાનો મુખ્ય ઉદ્દેશ પોષણયુક્ત આહાર, સ્વસ્થ જીવનશૈલી અને પરંપરાગત પૌષ્ટિક વાનગીઓ અંગે લોકોમાં જાગૃતિ ફેલાવવાનો રહ્યો હતો.
સ્પર્ધામાં બહેનોની ઉત્સાહભરી ભાગીદારી જોવા મળી હતી. વિવિધ વાનગીઓના માધ્યમથી સ્વાદ સાથે પોષણનું મહત્વ સમજાવવાનો પ્રયાસ કરવામાં આવ્યો હતો. કાર્યક્રમ દ્વારા પરિવારના દૈનિક આહારમાં પૌષ્ટિક તત્વોનો સમાવેશ કરવા અને સ્વસ્થ જીવનશૈલી અપનાવવાનો સંદેશ આપવામાં આવ્યો.
ધારાસભ્ય ડૉ. દર્શના દેશમુખે બહેનોની મહેનત, સર્જનાત્મકતા અને પોષણ અંગેની જાગૃતિને પ્રશંસનીય ગણાવી હતી. આ પ્રકારના કાર્યક્રમો લોકોમાં પોષણ અને આરોગ્ય અંગે જાગૃતિ વધારવામાં મહત્વપૂર્ણ ભૂમિકા ભજવી શકે છે.
