નવસારી ACB ટ્રેપઃ રૂ.40 હજારની લાંચ લેતા મદદનીશ ઇજનેર ઝડપાયો, નાયબ કાર્યપાલક ઇજનેર સામે પણ કાર્યવાહી

નવસારી/સુરત: સરકારી કામના બિલની ચુકવણી મંજૂર કરવાની કાર્યવાહી માટે લાંચ માંગવાના આક્ષેપમાં સુરત શહેર એ.સી.બીએ ગુજરાત રાજ્ય પોલીસ આવાસ નિગમ લિમિટેડના બે અધિકારીઓ સામે કાર્યવાહી કરી છે. એ.સી.બી.ના છટકા દરમિયાન રૂ.40 હજારની લાંચ સ્વીકારતા મદદનીશ ઇજનેર સ્થળ પરથી ઝડપાઈ ગયા હતા. ત્યારબાદ તપાસમાં નાયબ કાર્યપાલક ઇજનેરની પણ સંડોવણી સામે આવતાં તેમની સામે કાર્યવાહી કરવામાં આવી હોવાનું એ.સી.બી.ની વિગતોમાં જણાવાયું છે.

ફરિયાદી જાગૃત નાગરિકે સરકારી ટેન્ડર આધારે કંમ્પાઉન્ડ દીવાલનું બાંધકામ કર્યું હતું. આ દીવાલના બિલના નાણાં મંજૂર કરવાની કાર્યવાહી કરવા બદલ આરોપીઓ દ્વારા રૂ.50 હજારની લાંચની માંગણી કરવામાં આવી હોવાનો આક્ષેપ છે. રકઝક બાદ લાંચની રકમ રૂ.40 હજાર નક્કી થઈ હતી.

લાંચ આપવી ન હોવાથી ફરિયાદીએ સુરત શહેર એ.સી.બી.નો સંપર્ક કરી ફરિયાદ નોંધાવી હતી. ફરિયાદના આધારે એ.સી.બી.ની ટીમે છટકાનું આયોજન કર્યું હતું.

છટકા દરમિયાન નયન રાજાભાઇ બલદાણિયા, મદદનીશ ઇજનેર (કરાર આધારિત), પેટા વિભાગીય કચેરી, ગુજરાત રાજ્ય પોલીસ આવાસ નિગમ લિમિટેડ, નવસારી, ફરિયાદી પાસેથી રૂ.40 હજારની લાંચની માંગણી કરી સ્વીકારતા સ્થળ પર ઝડપાઈ ગયા હતા. એ.સી.બી.એ લાંચની રૂ.40 હજારની સંપૂર્ણ રકમ રિકવર કરી હતી.

તપાસ દરમિયાન બ્રિજેશભાઇ રમેશભાઇ ગોંડલીયા, નાયબ કાર્યપાલક ઇજનેર, વર્ગ-2, ગુજરાત રાજ્ય પોલીસ આવાસ નિગમ લિમિટેડ, નવસારી, પણ આરોપી તરીકે સામે આવ્યા હતા અને તેમની સામે પણ કાર્યવાહી કરવામાં આવી હોવાનું એ.સી.બી.એ જણાવ્યું છે.

સુરતમાં બન્યો લાંચનો છટકો

આ સમગ્ર કાર્યવાહી 10 સપ્ટેમ્બર, 2026ના રોજ સુરત ખાતે ગુજરાત રાજ્ય પોલીસ આવાસ નિગમ લિમિટેડના કાર્યપાલક ઇજનેરની કચેરી આવેલી શેરીમાં, નર્મદનગર સોસાયટીના મકાન નં.33 સામે કરવામાં આવી હતી.

સમગ્ર ટ્રેપની કાર્યવાહી સુરત શહેર એ.સી.બી. પોલીસ સ્ટેશનના પોલીસ ઇન્સ્પેક્ટર કે.જે. ધડુક તથા તેમની ટીમે હાથ ધરી હતી. મામલે આગળની તપાસ ચાલી રહી છે.