અમદાવાદ: અમદાવાદની અસારવા સ્થિત સિવિલ હોસ્પિટલમાં તબીબી બેદરકારીનો ગંભીર આક્ષેપ સામે આવ્યો છે. વેન્ટિલેટર પર સારવાર લઈ રહેલી માતાની મુલાકાત દરમિયાન તેમના પુત્રને વેન્ટિલેટરનું સ્વિચ કાઢીને બાજુમાં મૂકેલું હોવાનો દાવો કરતાં હોસ્પિટલમાં હોબાળો મચ્યો હતો. પરિવારજનોએ આ સમગ્ર મામલે તબીબોની બેદરકારીને જવાબદાર ઠેરવી ન્યાયની માગ કરી છે.
મળતી પ્રાથમિક માહિતી મુજબ, દર્દીને સિવિલ હોસ્પિટલમાં વેન્ટિલેટર પર રાખવામાં આવ્યા હતા. દરમિયાન દર્દીના પુત્ર ડૉ. અભિનવ સિંહ, જેઓ પોતે પણ એમ.ડી. તબીબ હોવાનું જણાવાયું છે, તેઓ માતાની મુલાકાતે પહોંચ્યા હતા. આ દરમિયાન તેમણે વેન્ટિલેટરનું સ્વિચ કાઢીને બાજુમાં મૂકેલું જોયું હોવાનો આક્ષેપ કર્યો છે.
આ બાબતે તેમણે ફરજ પરના તબીબો સમક્ષ રજૂઆત કરી હતી, પરંતુ સંતોષકારક જવાબ ન મળતાં ડૉ. અભિનવ સિંહે 100 નંબર પર ફોન કરીને પોલીસને જાણ કરી હતી. ત્યારબાદ સવારે શાહીબાગ પોલીસ સ્ટેશનમાં લેખિત ફરિયાદ પણ આપવામાં આવી હતી.
પરિવારજનોના જણાવ્યા અનુસાર, પોલીસ ફરિયાદ નોંધાવ્યાના આશરે એક કલાક બાદ દર્દીનું મૃત્યુ થયું હતું. આ ઘટનાને પગલે પરિવારે હોસ્પિટલના તબીબો અને સંબંધિત સ્ટાફની કામગીરી સામે ગંભીર સવાલો ઉઠાવ્યા છે.
પરિવારજનોની માગ છે કે સમગ્ર ઘટનાની નિષ્પક્ષ તપાસ કરવામાં આવે, વેન્ટિલેટરની કામગીરી અને સારવારના રેકોર્ડની ચકાસણી કરવામાં આવે તથા જવાબદાર લોકો સામે બેદરકારી સાબિત થાય તો તેમની વિરુદ્ધ એફઆઈઆર નોંધવામાં આવે.
હાલ આ મામલે પરિવાર દ્વારા કરવામાં આવેલા આક્ષેપોની સ્વતંત્ર પુષ્ટિ થવાની બાકી છે. હોસ્પિટલ પ્રશાસન અને પોલીસ તરફથી સત્તાવાર સ્પષ્ટતા સામે આવ્યા બાદ ઘટનાની વધુ વિગતો બહાર આવી શકે છે.
નોંધ: દર્દીના મૃત્યુ પાછળ તબીબી બેદરકારી જવાબદાર છે કે કેમ તે તપાસનો વિષય છે. સત્તાવાર તપાસ અને તબીબી રિપોર્ટ બાદ જ હકીકત સ્પષ્ટ થશે.
