ઈન્ડિયન પ્રીમિયર લીગની નવી સીઝનમાં દરરોજ કંઈક નવું જોવા મળી રહ્યું છે. ટીમ ઈન્ડિયામાંથી બહાર રહેલા અજિંક્ય રહાણેએ ચેન્નઈ સુપર કિંગ્સ તરફથી રમતી વખતે એવી ઈનિંગ રમી હતી, જે હંમેશા યાદ રહેશે. મુંબઈ ઈન્ડિયન્સ વિરૂદ્ધ રહાણે પ્રથમ વિકેટ પડ્યા બાદ મેદાનમાં ઉતર્યો હતો અને ધમાકેદાર ઈનિંગ્સ રમીને સીઝનની સૌથી ઝડપી અડધી સદી ફટકારી હતી.
ઈન્ડિયન પ્રીમિયર લીગની નવી સીઝનમાં અજિંક્ય રહાણેની ડૂબતી કારકિર્દીની પ્રશંસા કરવામાં આવી છે. મહેન્દ્ર સિંહ ધોનીએ તેને ત્રીજી મેચમાં જ રમવાની તક આપી. આ સિનિયર ખેલાડીને પ્રથમ વખત પ્લેઇંગ ઇલેવનમાં તક આપવામાં આવી હતી અને તેણે ધમાકેદાર ઇનિંગ રમીને રેકોર્ડ બનાવ્યો હતો.
ચેન્નઈ સુપર કિંગ્સ સામે પ્રથમ બેટિંગ કરતા મુંબઈ ઈન્ડિયન્સે 8 વિકેટના નુકસાને 157 રન બનાવ્યા હતા. ઈશાન કિશને સૌથી વધુ 32 રન અને ટીમ ડેવિડે 31 રન બનાવ્યા હતા. કેપ્ટન રોહિત શર્મા 21 રન બનાવીને આઉટ થયો હતો.
મુંબઈ ઈન્ડિયન્સ સામે લક્ષ્યનો પીછો કરવા ઉતરેલી ચેન્નઈની ટીમને પહેલી જ ઓવરમાં જ ડેવોન કોનવેના રૂપમાં આંચકો લાગ્યો હતો. આ પછી મહેન્દ્ર સિંહ ધોનીએ અનુભવી અજિંક્ય રહાણેને મેદાન પર બેટિંગ કરવા મોકલ્યો હતો. કેટલાક લોકોને આ નિર્ણય વિચિત્ર લાગ્યો, પરંતુ તેણે માત્ર 19 બોલમાં ફિફ્ટી ફટકારીને બધાના મોં બંધ કરી દીધા.
ઈન્ડિયન પ્રીમિયર લીગની આ સીઝનમાં સૌથી ઝડપી ફિફ્ટીનો રેકોર્ડ બનાવીને અજિંક્ય રહાણે પરત ફર્યો હતો. આ બેટ્સમેને 6 ચોગ્ગા અને 3 છગ્ગાની મદદથી IPL 2023ની સૌથી ઝડપી અડધી સદીનો રેકોર્ડ બનાવ્યો હતો. તે 27 બોલમાં 7 ચોગ્ગા અને 3 છગ્ગા ફટકારીને 61 રનની શાનદાર ઇનિંગ રમીને પાછો ફર્યો હતો.
IPLની આ સીઝનમાં રાજસ્થાનના જોસ બટલર અને કોલકાતા નાઈટ રાઈડર્સના શાર્દુલ ઠાકુરે 20-20 બોલમાં અડધી સદી ફટકારી છે. અજિંક્ય રહાણેએ આ બંને કરતા 1 બોલ ઓછા લઈને ફિફ્ટી ફટકારી અને રેકોર્ડ તોડ્યો. આઈપીએલના ઈતિહાસમાં સૌથી ઝડપી ફિફ્ટીની વાત કરીએ તો પંજાબ કિંગ્સ માટે કેએલ રાહુલ અને કેકેઆર માટે પેટ કમિન્સે 14-14 બોલમાં આ કારનામું કર્યું હતું.
