અમદાવાદ: દિવાળીના પર્વની ખુશીઓ સમાજના દરેક વર્ગ સુધી પહોંચે અને ગરીબ તથા જરૂરિયાતમંદ પરિવારો પણ તહેવારની મીઠાશ માણી શકે તેવા સેવાભાવી ઉદ્દેશ સાથે ઉમંગ સેવા ટ્રસ્ટ દ્વારા સરાહનીય પહેલ કરવામાં આવી હતી. ટ્રસ્ટ દ્વારા 5 નવેમ્બર, 2026ના રોજ ગરીબ અને જરૂરિયાતમંદ લોકોને મીઠાઈનું વિતરણ કરવામાં આવ્યું હતું.
ઉમંગ સેવા ટ્રસ્ટ છેલ્લા 15 વર્ષથી દર વર્ષે દિવાળીના પર્વ નિમિત્તે મીઠાઈ વિતરણનું સેવાકાર્ય કરી રહ્યું છે. આ વર્ષે પણ પોતાની સેવાકીય પરંપરા જાળવી રાખીને ટ્રસ્ટના સભ્યો અને સેવાભાવી કાર્યકરોએ જરૂરિયાતમંદ લોકો સુધી દિવાળીની ખુશીઓ પહોંચાડવાનો પ્રયાસ કર્યો હતો.
આ અભિયાનનો મુખ્ય હેતુ આર્થિક રીતે નબળા પરિવારો પણ દિવાળીના પર્વની ઉજવણી આનંદ અને ઉત્સાહથી કરી શકે તથા તેમના ચહેરા પર ખુશી લાવી શકાય તેવો છે. ટ્રસ્ટનું માનવું છે કે તહેવારોની સાચી ખુશી ત્યારે જ સાર્થક બને છે જ્યારે સમાજના ગરીબ અને જરૂરિયાતમંદ લોકો પણ તેમાં સહભાગી બને.
આ પ્રસંગે અશોક શાહ, પ્રકાશ પટણી, સુનિલ પટેલ, ભરત પરમાર, અંજલિ ગેડમ, ઉત્તમ પરમાર, દીપક કટારીયા, હાર્દિક આચાર્ય, હિરેન સાગર, મંથન દોંગા, રામ રેવતકર, ભારતી શ્રીવાસ્તવ, રીઝવના મનસુરી, નેહાન મનસુરી, દુર્ગાબેન રાજપૂત અને સરફરાઝ મનસુરી સહિતના સેવાભાવી મિત્રો ઉપસ્થિત રહ્યા હતા.
ઉમંગ સેવા ટ્રસ્ટ છેલ્લા 15 વર્ષથી વિવિધ સેવાકીય પ્રવૃત્તિઓના માધ્યમથી સમાજના જરૂરિયાતમંદ લોકોની મદદ માટે સતત કાર્યરત છે. આ સેવાકાર્યને સફળ બનાવવા સહયોગ આપનાર તમામ દાતાશ્રીઓ, મિત્રો અને કાર્યકરોનો ટ્રસ્ટ દ્વારા હૃદયપૂર્વક આભાર વ્યક્ત કરવામાં આવ્યો હતો.
