ડેનમાર્કના હોર્સન્સમાં રમાઈ રહેલા થોમસ એન્ડ ઉબેર કપ 2026માં ભારતીય પુરૂષ ટીમે ઈતિહાસ દોહરાવતા સેમીફાઈનલમાં પ્રવેશ કરી લીધો છે. ક્વાર્ટર ફાઈનલના રોમાંચક મુકાબલામાં ભારતે મજબૂત ગણાતી ચાઈનીઝ તાઈપેઈની ટીમને 3-0થી હરાવીને ટૂર્નામેન્ટમાં પોતાનો મેડલ સુનિશ્ચિત કર્યો છે.
૨૦૨૨ના ચેમ્પિયન ભારતનો સામનો હવે ફાઈનલમાં સ્થાન મેળવવા માટે જાપાન અથવા ફ્રાન્સ સામે થશે. લક્ષ્ય સેનની હૃદયધબક જીત ભારતને પ્રથમ પોઈન્ટ અપાવવાનું કામ વર્લ્ડ નંબર 6 લક્ષ્ય સેને કર્યું હતું. લક્ષ્ય સેને ચૌ ટીન ચેન સામેના મુકાબલામાં બે મેચ પોઈન્ટ બચાવીને 18-21, 22-20, 21-17થી જીત મેળવી હતી. ૧ કલાક અને ૨૮ મિનિટ ચાલેલા આ સંઘર્ષપૂર્ણ મેચમાં લક્ષ્યે બીજા ગેમમાં પછાત રહ્યા બાદ શાનદાર વાપસી કરી હતી અને ભારતને ૧-૦ની સરસાઈ અપાવી હતી.
સાત્વિક-ચિરાગની જોડીએ સરસાઈ બેગણી કરી ત્યારબાદ એશિયન ચેમ્પિયન્સ સાત્વિકસાઈરાજ રેન્કીરેડ્ડી અને ચિરાગ શેટ્ટીની જોડીએ ભારતની પકડ મજબૂત બનાવી હતી. તેમણે ચિઉ સિયાંગ ચેહ અને વાંગ ચી-લિન સામેની રોમાંચક મેચ 23-21, 19-21, 21-12થી જીતી લીધી હતી. આ જોડીએ તાઈપેઈની જોડી સામે પોતાની સતત ત્રીજી જીત નોંધાવીને ભારતનો સ્કોર ૨-૦ કરી દીધો હતો. આયુષ શેટ્ટીનો વિજયી પંચ ભારત માટે જીતની અંતિમ મહોર ૨૦ વર્ષીય યુવા ખેલાડી આયુષ શેટ્ટીએ મારી હતી.
એશિયન ચેમ્પિયનશિપના સિલ્વર મેડલિસ્ટ આયુષે ઓલ ઈંગ્લેન્ડ ચેમ્પિયન લિન ચુન-ઈને સીધા સેટમાં 21-16, 21-17થી પરાજય આપ્યો હતો. માત્ર ૪૮ મિનિટમાં આ મેચ જીતીને આયુષે ભારતીય કેમ્પમાં જીતની ઉજવણી શરૂ કરી દીધી હતી. આયુષે પૂરી ટૂર્નામેન્ટમાં અજેય રહીને સાબિત કર્યું છે કે તે આગામી સમયનો સ્ટાર ખેલાડી છે
