‘મોદીજી ડરશો નહીં’ના વિકલ્પ સાથે સોશિયલ મીડિયા પર જાહેર સર્વે, રાજનાથ સિંહ, નીતિન ગડકરી સહિતના ભાજપના નેતાઓને ચર્ચા માટે મનાવવા કરી અપીલ
દેશના રાજકારણમાં પ્રધાનમંત્રી નરેન્દ્ર મોદી અને લોકસભામાં વિપક્ષના નેતા રાહુલ ગાંધી વચ્ચે ખુલ્લી ચર્ચાની માંગને લઈને નવો વિવાદ ઊભો થયો છે. રાહુલ ગાંધીએ પ્રધાનમંત્રી મોદી પર વિપક્ષને દેશવિરોધી ગણાવવાના મુદ્દે નિશાન સાધ્યું છે અને ખુલ્લા મંચ પર ચર્ચા કરવાનો પડકાર ફરી આપ્યો છે. આ મુદ્દે તેમણે સોશિયલ મીડિયા પ્લેટફોર્મ X પર જાહેર પોલ યોજીને રાજકીય ચર્ચાને વધુ વેગ આપ્યો છે.
X પર પોલ યોજી ભાજપના નેતાઓને કરી અપીલ
રાહુલ ગાંધીએ X પર એક પોલ પોસ્ટ કરીને સવાલ કર્યો હતો કે શું લોકો રાહુલ ગાંધી અને નરેન્દ્ર મોદી વચ્ચે ખુલ્લી ચર્ચા જોવા માંગે છે? આ પોલમાં ‘હા, મોદીજી ડરશો નહીં’ અને ‘ના, મોદીજી ડરી ગયા’ જેવા વિકલ્પો આપવામાં આવ્યા હતા.
આ સાથે રાહુલ ગાંધીએ ભાજપના વરિષ્ઠ નેતાઓ અને કેન્દ્રીય મંત્રીઓ રાજનાથ સિંહ, નીતિન ગડકરી, શિવરાજ સિંહ ચૌહાણ અને ઉત્તર પ્રદેશના મુખ્યમંત્રી યોગી આદિત્યનાથને સંબોધીને અપીલ કરી હતી કે તેઓ પ્રધાનમંત્રી મોદીને આ ખુલ્લી ચર્ચામાં ભાગ લેવા માટે મનાવે.
24 કલાક બાદ વીડિયો જાહેર કરી ફરી આપ્યો પડકાર
રાહુલ ગાંધીએ ચર્ચાનો પ્રથમ પડકાર આપ્યાના 24 કલાક બાદ વીડિયો સંદેશ જાહેર કર્યો હતો. તેમાં તેમણે કહ્યું હતું કે, પ્રધાનમંત્રી મોદીએ વિપક્ષને દેશવિરોધી ગણાવ્યો છે, તો પછી કોઈપણ સ્થળ કે મંચ પસંદ કરીને ખુલ્લી ચર્ચા કરવી જોઈએ.
રાહુલ ગાંધીએ સવાલ ઉઠાવ્યો હતો કે દેશવિરોધી કોણ છે? વિદેશી તાકાતો સાથે કોના સંબંધો છે અને આ સંબંધો કેવા છે? તેમણે પ્રધાનમંત્રી મોદીને વિલંબ કર્યા વિના ચર્ચા માટે આગળ આવવા અપીલ કરી હતી.
એકતા દિવસના ભાષણ બાદ શરૂ થયો વિવાદ
આ સમગ્ર રાજકીય વિવાદની શરૂઆત સરદાર વલ્લભભાઈ પટેલની જન્મજયંતિ નિમિત્તે યોજાયેલા એકતા દિવસના કાર્યક્રમમાં પ્રધાનમંત્રી નરેન્દ્ર મોદીના સંબોધન બાદ થઈ હતી. પ્રધાનમંત્રીએ વિપક્ષ પર પ્રહાર કરતાં કહ્યું હતું કે દેશમાં વિપક્ષની ભૂમિકા ભજવવાને બદલે કેટલાક લોકો ‘અવરોધ પક્ષ’ બની ગયા છે અને દેશના વિકાસમાં અડચણો ઊભી કરી રહ્યા છે.
પ્રધાનમંત્રીએ કોઈનું નામ લીધા વિના વિદેશમાં કેટલાક લોકોની મુલાકાતો, દેશવિરોધી તાકાતોનું સમર્થન અને સોશિયલ મીડિયાના માધ્યમથી ભારતની છબી ખરાબ કરવાના પ્રયાસો અંગે પણ ચિંતા વ્યક્ત કરી હતી.
રાજકીય ટકરાવમાં હવે ખુલ્લી ચર્ચાનો મુદ્દો કેન્દ્રસ્થાને
પ્રધાનમંત્રી મોદીના નિવેદનો બાદ રાહુલ ગાંધીએ ખુલ્લી ચર્ચાની માંગ સાથે વળતો પ્રહાર કર્યો છે. એક તરફ પ્રધાનમંત્રીના વિપક્ષ અંગેના નિવેદનો અને બીજી તરફ રાહુલ ગાંધીનો જાહેર ચર્ચાનો પડકાર રાજકીય ચર્ચાનો વિષય બન્યો છે. હવે આ મુદ્દે ભાજપ તરફથી શું પ્રતિક્રિયા આવે છે અને ખુલ્લી ચર્ચાની માંગ અંગે આગળ શું રાજકીય ઘટનાક્રમ સર્જાય છે તેના પર સૌની નજર રહેશે.
