જો તમે ખાનગી નોકરી કરો છો તો તમારા માટે ગુડ ન્યૂઝ છે. EPFO એ એવા લોકોને વધુ પેન્શન મેળવવાની તક આપી છે જેઓ ગત વખતે આ તક ગુમાવી ચૂક્યા હતા. EPFOએ આ અંગે 20 ફેબ્રુઆરીએ એક પરિપત્ર બહાર પાડ્યો છે. ગયા વર્ષે નવેમ્બરમાં સુપ્રીમ કોર્ટના નિર્ણયને ધ્યાનમાં રાખીને આ પરિપત્ર જાહેર કરવામાં આવ્યો છે. EPFOએ તેની તમામ પ્રાદેશિક અને ઝોનલ ઓફિસોને સૂચનાઓ જારી કરી છે કે કર્મચારીઓએ હાઇ પેન્શન માટે કેવી રીતે અરજી કરવી પડશે. આ સંબંધમાં EPFOના પરિપત્રની લાંબા સમયથી રાહ જોવાઈ રહી હતી. તેનું કારણ એ છે કે સુપ્રીમ કોર્ટે ગયા વર્ષે નવેમ્બરમાં આપેલા પોતાના નિર્ણયમાં આ માટે 3 માર્ચની સમયમર્યાદા નક્કી કરી હતી.
EPFOનો પેન્શન પ્લાન શું છે?
સૌથી પહેલા તમારા માટે એ જાણવું જરૂરી છે કે EPFO ખાનગી ક્ષેત્રમાં કામ કરતા કરોડો લોકોના પેન્શન ફંડ (EPF) અને પેન્શન સ્કીમ (EPS)નું સંચાલન કરે છે. કર્મચારીની ઉંમર 58 વર્ષ પૂર્ણ થવા પર તેને EPFO તરફથી પેન્શન મળે છે. નિવૃત્તિ પર તેને ભવિષ્ય નિધિમાં જમા કરવામાં આવેલા પૈસા પણ મળે છે. તમારા માટે એ જાણવું પણ જરૂરી છે કે સરકારી નોકરીઓમાં નિવૃત્તિની ઉંમર 60 વર્ષ છે, જ્યારે ખાનગી નોકરીઓમાં તે 58 વર્ષ છે.
હવે શું વ્યવસ્થા છે?
હાલમાં, કર્મચારી અને એમ્પ્લોયર (કંપની) કર્મચારીના મૂળ પગાર અને મોંઘવારી ભથ્થા (DA)ના 12 ટકા EPFમાં યોગદાન (ડિપોઝિટ) કરે છે. કર્મચારીનું સંપૂર્ણ યોગદાન EPF (પ્રોવિડન્ટ ફંડ)માં જાય છે. પરંતુ, એમ્પ્લોયર (કંપની)નું સંપૂર્ણ 12% યોગદાન EPF તરફ જતું નથી. આને 3.67 ટકા અને 8.33 ટકા (3.67+ 8.33 = 12 ટકા)ના બે ભાગમાં વહેંચવામાં આવે છે. 3.67 ટકા EPFમાં જાય છે. 8.33 ટકા EPS પર જાય છે. આ સિસ્ટમ દર મહિને અનુસરવામાં આવે છે. આ સિવાય કેન્દ્ર સરકાર કર્મચારીઓના EPSમાં 1.16 ટકા યોગદાન આપે છે. આનો અર્થ એ છે કે કર્મચારી EPSમાં કોઈ યોગદાન આપતો નથી.
તમારું પેન્શન કેવી રીતે વધશે?
હાલમાં પેન્શન માટે પગારની મર્યાદા 15,000 રૂપિયા પ્રતિ માસ નક્કી કરવામાં આવી હતી. એટલે કે, કર્મચારીના EPSમાં દર મહિને યોગદાન આ 15,000 રૂપિયામાંથી છે. આનો અર્થ એ થયો કે પ્રાઈવેટ જોબ કરનાર વ્યક્તિનો પગાર ભલે ગમે તેટલો વધી જાય, પરંતુ તેના EPSમાં જમા પૈસા વધતા નથી. તેનું કારણ પેન્શન માટે પગાર પર 15,000 રૂપિયા પ્રતિ માસની મર્યાદા છે.
EPFO દ્વારા 20 ફેબ્રુઆરીએ જાહેર કરાયેલા પરિપત્ર બાદ હવે 8.33ની કપાત દર મહિને 15,000 રૂપિયાના પગારને બદલે કર્મચારીના વાસ્તવિક મૂળ પગાર પર આધારિત હશે. ખાનગી નોકરી કરતા ઘણા લોકોનો મૂળ પગાર સામાન્ય રીતે 15000 રૂપિયાથી વધુ હોય છે, જેના કારણે દર મહિને EPSમાં જમા થતી રકમ વધશે. તેનાથી લાંબા ગાળે તેના પેન્શન ફંડમાં જમા રકમમાં પણ વધારો થશે. આ સાથે તેમને નિવૃત્તિ પછી વધુ પેન્શન મળશે.
તમારે કેવી રીતે અરજી કરવી પડશે?
EPFO દ્વારા 20 ફેબ્રુઆરીના રોજ જાહેર કરાયેલા પરિપત્ર પછી, EPFOના આવા સબસ્ક્રાઇબર્સ કે જેઓ 31 ઓગસ્ટ, 2014ના રોજ EPFOના સભ્ય હતા, પરંતુ EPS હેઠળ હાઇ પેન્શન સ્કીમનો ઓપ્શન પસંદ કર્યો નથી, તેઓ માર્ચ પહેલા તેના માટે અરજી કરી શકે છે. EPFOએ કહ્યું છે કે આ માટે કર્મચારી અને એમ્પ્લોયર (કંપની)એ સંયુક્ત રીતે EPFOને અરજી કરવી પડશે. આ માટે EPFO દ્વારા જલ્દી જ સુવિધા આપવામાં આવશે. EPFO ટૂંક સમયમાં તેનું URL જાહેર કરશે.
