ગુજરાત સહિત સમગ્ર દેશમાં કોરોના વાઈરસની બીજી લહેરનો હાહાકાર જોવા મળી રહ્યો છે. એમાય જીવલેણ કોરોના વાઈરસે અમદાવાદને અજગરી ભરડામાં લીધુ હોય, તેમ પ્રતિદિન નોંધાતા નવા આંકડાઓ જૂનો રેકોર્ડ તોડી રહ્યાં છે. શહેરમાં સતત બીજા દિવસે કોરોનાના 5 હજાર કરતાં વધુ નવા કેસ નોંધાયા છે.
કોરોનાની ગંભીર સ્થિતિનો અંદાજો એ વાત પરથી જ લગાવી શકાય છે કે, માર્ચ મહિનાના પ્રથમ 23 દિવસમાં શહેરમાં કુલ 4,202 કેસ નોંધાયા હતા. જેની સામે એપ્રિલ મહિનાના 24 દિવસમાં જ કુલ 54,091 કેસ સામે આવી ચૂક્યા છે.
સરકારી આંકડા અનુસાર, ગત શુક્રવારે અમદાવાદમાં 5,411 પોઝિટિવ કેસ સામે આવ્યા હતા. જે શનિવારે વધીને 5,617 પર પહોંચી ગયા છે. આ સાથે જ અમદાવાદમાં કોરોના સંક્રમિતોનો કુલ આંકડો વધીને 1,27,316 પર પહોંચી ચૂક્યો છે
