લોકસભા ચૂંટણી માટે કોંગ્રેસની પ્રથમ યાદી ટૂંક સમયમાં જાહેર થઈ શકે છે. કોંગ્રેસની કેન્દ્રીય ચૂંટણી સમિતિ (CEC)ની બેઠક આજે સાંજે ૬ વાગ્યે મળશે. આ બેઠકમાં ઉમેદવારોના નામ ફાઈનલ થઈ શકે છે. આજની બેઠકમાં અનેક રાજ્યોની બેઠકો માટે ઉમેદવારો નક્કી થઈ શકે છે. સૂત્રોના જણાવ્યા અનુસાર પેનલે દરેક લોકસભા સીટ માટે બેથી ચાર નામ તૈયાર કર્યા છે.
આ બેઠકમાં કોંગ્રેસના રાષ્ટ્રીય અધ્યક્ષ મલ્લિકાર્જુન ખડગે, સોનિયા ગાંધી, રાહુલ ગાંધી સહિત ઘણા નેતાઓ હાજરી આપી શકે છે. સૂત્રોના જણાવ્યા અનુસાર મોટાભાગના રાજ્યોમાં ઉમેદવારોની સ્ક્રીનિંગ લગભગ આખરી થઈ ગઈ છે. એવું કહેવામાં આવી રહ્યું છે કે રાહુલ ગાંધી અમેઠી અને વાયનાડથી ચૂંટણી લડી શકે છે, જ્યારે પ્રિયંકા ગાંધી વાડ્રાની રાયબરેલીથી ઉમેદવારી અંગે અટકળો વધુ છે.
અમેઠી-રાયબરેલી, ગાંધી પરિવારનો ગઢ : બંને બેઠકો ગાંધી પરિવારનો ગઢ માનવામાં આવે છે કારણ કે સોનિયા ગાંધી આ બંને બેઠકો પર ચૂંટણી લડી ચૂકયા છે. સૂત્રોનું કહેવું છે કે કોંગ્રેસના સ્થાનિક એકમોએ માંગ કરી છે કે માત્ર ગાંધી પરિવારના સભ્યો જ ત્યાંથી ચૂંટણી લડે. જો કે પ્રથમ યાદીમાં કયા ઉમેદવારોના નામ જાહેર થાય છે તે જોવું રહ્યું.
