છેલ્લા 21 દિવસથી સતત પેટ્રોલ-ડીઝલના ભાવમાં વધારો થઈ રહ્યો છે. છેલ્લા 21 દિવસમાં ડીઝલમાં 11 જયારે પેટ્રોલમાં 9 રૂપિયા કરતા વધુનો વધારો થયો છે. સતત થઈ રહેલા ભાવ વધારાથી સામાન્ય લોકોની મુશ્કેલીમાં વધારો થઈ રહ્યો છે. ત્યારે કોંગ્રેસ દ્વારા વિરોધ પ્રદર્શન કર્યું હતું અમદાવાદમાં ભાવ વધારા મુદ્દે શહેર પ્રમુખની હાજરીમાં દેખાવો કરવામાં આવ્યા હતા.
કોંગ્રેસના શહેર પ્રમુખ શશીકાંત પટેલ અને દાણીલીમડાના કોર્પોરેટર શહેઝાદખાનની આગેવાનીમાં કોંગ્રેસે શહેરના ખોડિયાર નગર ચાર રસ્તા પાસે વિરોધ કર્યો હતો. કોંગ્રેસે બાઇકની અંતિમ યાત્રા યોજી હતી. કોંગ્રેસ કાર્યકર્તાઓ બેનરો સાથે રોડ પર ઉતર્યા હતા. તેમણે આ ભાવ વધારો પાછો ખેંચવા માટે પણ માગ કરી હતી. તો વિરોધ બાદ પોલીસે કોંગ્રેસ શહેર પ્રમુખ અને દાણીલીમડાના કોર્પોરેટરની અટકાયત પણ કરી હતી.
