ડિસેમ્બર મહિનાની મધ્યમાં વીડિયો બનાવીને ડોન જેવી છાપ ઉભી કરનારા બે લબ્બર મૂછીયાઓ પોલીસના હાથમાં આવતાની સાથે જ ઢીલા ઢસ થઈ ગયા હતા. સુરત શહેરમાં રસ્તા પર હાથમાં બંદૂક અને સિગરેટ રાખીને વીડિયો બનાવતા બે લોકોને પકડી લીધા છે.
આ બે શખ્સોએ કોરોનાના લીધે લાગુ કરાયેલા રાત્રી કર્ફ્યૂ, કાયદો વ્યવસ્થા તથા આરટીઓના નિયમોના લીરેલીરા ઉડાડ્યા હતા. પોતે ગેંગસ્ટર હોય તે રીતે વીડિયો બનાવીને મજા લૂંટનારા શખ્સોનો વીડિયો વાયરલ થયા બાદ પોલીસ દ્વારા કાર્યવાહી કરવામાં આવી છે. આ અંગે રાજ્યના ગૃહ રાજ્યમંત્રી હર્ષ સંઘવીએ પણ આ અંગે કડક શબ્દોમાં ગુનાખોરી કરનારાઓ ચેતવણી આપી છે.
આ વીડિયો સોશિયલ મીડિયામાં વાયરલ થયા બાદ તેની નોંધ લેવાઈ હતી અને પોલીસને આરોપીઓને ઝડપી પાડવા માટે સૂચના આપવામાં આવી હતી. જે બાદ બાઈક ચલાવનારા અને તેના ખભા પર બેસીને સ્ટન્ટ કરનારા બન્ને યુવાનોને ઝડપી લેવામાં આવ્યા છે. ગૃહ રાજ્યમંત્રી હર્ષ સંઘવીએ ટ્વિટ કરીને બન્ને લબ્બર મૂછીયાઓના ફોટો શેર કર્યો છે અને જણાવ્યું છે કે, અમે તેમને પકડી લીધા છે, ૧૪ ડિસેમ્બરના વીડિયો છે અને વીડિયોમાં દેખાતી પિસ્તોલ લાઈટર છે, આ પ્રકારના ગુનાઓને લઈને અમે ઘણાં જ ગંભીર છીએ. પકડાયેલા બન્ને શખ્સોમાં બાઈક ચલાવતો શખ્સ અમરોલી છાપરાભાઠાનો ભરત પ્રવીણભાઈ ગઢવી હોવાનું અને તે રત્નકલાકાર તરીકે કામ કરતો હોવાનું જાણવા મળ્યું છે.
આ સિવાય બાઈક ચલાવતા ભરતના ખભા પર બેઠેલો શખ્સ નાગાજણ હરદાસભાઈ ઓડેદાર હોવાનું બહાર આવ્યું છે. જે અમરોલી છાપરાભાઠા રહે છે. પોલીસે કરેલી પૂછપરછમાં જાણવા મળ્યું કે ભરત અને નાગાજણે આ વીડિયો ૧૪ ડિસેમ્બરની રાત્રે ૨ વાગ્યે સાયણ રોડ પર બનાવ્યો હતો. જે તેમણે ૨૬ ડિસેમ્બરે અપલોડ કર્યો હતો. એટલે કે ખલનાયક બનવાની કોશિશ કરનારા આ બન્ને યુવકો પોલીસના હાથમાં આવતા, બકરી ડબ્બામાં આવવા જેવો ઘાટ સર્જાયો હતો.
