રાહુલ ગાંધીની ભારત જોડો ન્યાય યાત્રાના સમાપન પ્રસંગે મુંબઈમાં આયોજિત ઈન્ડિયા એલાયન્સની રેલીમાં વિપક્ષી નેતાઓએ ઈલેક્ટ્રોનિક વોટિંગ મશીન (ઇવીએમ) પર જોરદાર નિશાન સાધ્યું હતું.
નેશનલ કોન્ફરન્સના પ્રમુખ ફારૂક અબ્દુલ્લાએ કહ્યું કે ગઠબંધનની સરકાર આવશે તો ઈવીએમ હટાવી દેવામાં આવશે અને ચૂંટણી પંચને સ્વતંત્ર કરવામાં આવશે.
તેમણે કહ્યું, “ઇવીએમ મશીન ચોર છે. તમારે તમારો મત બચાવવો પડશે. જ્યારે તમે બટન દબાવો છો, ત્યારે જુઓ કે તમે જ્યાં મતદાન કર્યું છે તે જગ્યાએ વોટ ગયો કે અન્ય કોઈને ? અમે આ મશીનને હટાવવા માટે ઘણી ધમાલ કરી. મને આશા છે કે જ્યારે ભારતમાં ગઠબંધન સરકાર આવશે, ત્યારે તેમાં આ મશીન સમાપ્ત થઈ જશે.”
રાહુલ ગાંધીએ પોતાના સંબોધનમાં કહ્યું કે “રાજાનો આત્મા ઇવીએમમાં છે અને તે ભારતની દરેક સંસ્થામાં છે, તે ઇડી, સીબીઆઇ અને આવકવેરા વિભાગમાં પણ છે.”
રાહુલ ગાંધીએ કહ્યું કે, “અમે એક શક્તિ સામે લડી રહ્યા છીએ.
“ચૂંટણી પંચ ઈવીએમ માંથી નીકળતી સ્લિપની ગણતરી કરવા કેમ તૈયાર નથી ?”
આ જ રેલીમાં કોંગ્રેસના રાષ્ટ્રીય અધ્યક્ષ મલ્લિકાર્જુન ખડગેએ કહ્યું હતું કે, “મોદીજી પાસે આરએસએસ, આરએસએસની વિચારધારા અને મનુવાદની શક્તિ છે. તેઓ આપણને સંપૂર્ણ રીતે કચડી નાખવા માંગે છે.”
“કર્ણાટકના એક બીજેપી સાંસદ કહે છે કે બે તૃતીયાંશ બહુમતી જરૂરી છે કારણ કે બંધારણ બદલવું પડશે. આ સારા માટે નથી. અમને લોકશાહી અને બંધારણ નસીબથી મળ્યું છે.
એનસીપી (એસસીપી)ના વડા શરદ પવારે કહ્યું કે, “આ શહેરમાં જ મહાત્મા ગાંધીએ ‘ભારત છોડો’ નો નારો આપ્યો હતો. આજે એ જ શહેરમાં આપણે બીજેપીથી કેવી રીતે છુટકારો મેળવી શકાય તે વિશે વિચાર કરવો જોઈએ.
રેલીમાં સામેલ બિહારના પૂર્વ નાયબ મુખ્યમંત્રી અને આરજેડી નેતા તેજસ્વી યાદવે કહ્યું, “ભારત જોડો ન્યાય યાત્રાનો આજે છેલ્લો દિવસ છે. રાહુલ ગાંધીએ દેશભરમાં પ્રવાસ કરીને સંદેશ આપવાનો પ્રયાસ કર્યો છે.”
“આજે એક તરફ નફરત ફેલાવવામાં આવી રહી છે, સંઘર્ષની વાતો થઈ રહી છે, પ્રચાર થઈ રહ્યો છે, બંધારણીય સંસ્થાઓને હાઈજેક કરવામાં આવી રહી છે, ચૂંટાયેલી સરકારોને ઈડી અને સીબીઆઈ દ્વારા ધાકધમકી આપીને ખરીદવામાં આવી રહી છે, તોડી નાખવામાં આવી રહી છે. આવા સમયે દેશની લોકશાહી અને બંધારણને બચાવવા, શાંતિ, સુલેહ અને ભાઈચારો સ્થાપિત કરવા અને નફરતને હરાવવા માટે તેમણે જે યાત્રા હાથ ધરી છે તેના માટે રાહુલ ગાંધીનો આભાર માનું છું.
કોંગ્રેસ મહાસચિવ પ્રિયંકા ગાંધી, કાશ્મીરના ભૂતપૂર્વ મુખ્ય પ્રધાન અને પીડીપી નેતા મહેબૂબા મુફ્તી, તમિલનાડુના મુખ્ય પ્રધાન અને ડીએમકેના નેતા એમકે સ્ટાલિન, શિવસેના (યુબીટી)ના નેતા અને મહારાષ્ટ્રના ભૂતપૂર્વ મુખ્ય પ્રધાન ઉદ્ધવ ઠાકરે ભારત ગઠબંધનની આ રેલીમાં હાજર રહ્યા હતા. મુંબઈના શિવાજી પાર્કમાં અનેક વિપક્ષી નેતાઓએ ભાગ લીધો હતો.
ઉત્તર પ્રદેશના પૂર્વ મુખ્યમંત્રી અને સપા પ્રમુખ અખિલેશ યાદવ આ રેલીમાં સામેલ થયા ન હતા. તેણે પોતાની વ્યસ્તતા દર્શાવી હતી.ઈન્ડિયા એલાયન્સના ઘટક પક્ષો વચ્ચે સીટોની વહેંચણી પર આજે દિલ્હીમાં બેઠક યોજાવાની છે.
