છેલ્લા કેટલાક દિવસોથી ભારત અને પાકિસ્તાન વચ્ચે સરહદ પર ચાલી રહેલો તણાવ ચરમસીમાએ પહોંચ્યા બાદ આખરે બંને દેશો વચ્ચે યુદ્ધવિરામ પર સહમતિ સધાઈ છે.
ભારતના વિદેશ સચિવ વિક્રમ મિસરીએ આજે સાંજે એક મહત્વપૂર્ણ પ્રેસ બ્રીફિંગમાં આ અંગેની પુષ્ટિ કરી હતી. તેમણે જણાવ્યું હતું કે પાકિસ્તાન તરફથી કરવામાં આવેલી યુદ્ધવિરામની વિનંતીને માન આપીને ભારતે આ નિર્ણય લીધો છે અને હવેથી બંને દેશોની સરહદો પર કોઈપણ પ્રકારની સૈન્ય કાર્યવાહી નહીં થાય. આ ઘટનાક્રમને અમેરિકાના વિદેશ સચિવ માર્કો રુબિયોએ પણ સમર્થન આપ્યું છે, જેમણે આ સમગ્ર મામલે સક્રિય મધ્યસ્થીની ભૂમિકા ભજવી હતી.
આ પહેલાં, પાકિસ્તાને આશ્ચર્યજનક રીતે દાવો કર્યો હતો કે તેની સેનાએ ભારતના ત્રણ મહત્વપૂર્ણ એરબેઝ પર સફળતાપૂર્વક હુમલા કર્યા છે અને ત્યારબાદ પોતાની હવાઈ સીમાને પણ બંધ કરી દીધી છે. જો કે, ભારતના વિદેશ મંત્રાલય અને સેના દ્વારા યોજાયેલી સંયુક્ત પત્રકાર પરિષદમાં આ દાવાઓને ખોટા ઠેરવવામાં આવ્યા હતા. ભારતે સ્પષ્ટપણે જણાવ્યું હતું કે પાકિસ્તાન દ્વારા પશ્ચિમી સરહદો પર હાઈ સ્પીડ મિસાઈલો, ડ્રોન, ફાઈટર જેટ્સ અને ભારે કેલિબર હથિયારોથી હુમલો કરવામાં આવ્યો હતો, જેનો ભારતીય સેનાએ પણ સખત અને અસરકારક જવાબ આપ્યો હતો.
ભારતીય સેનાએ વળતા પ્રહારમાં પાકિસ્તાનના રાવલપિંડી સ્થિત નૂર ખાન એરબેઝ, પંજાબના મુરીદ એરબેઝ, રફીકી અને શોરકોટ એરબેઝ પર સફળ હવાઈ હુમલા કર્યા હતા, જેના કારણે પાકિસ્તાનના લશ્કરી માળખાને ભારે નુકસાન થયું હતું. આ ઉપરાંત લાહોર અને પાકિસ્તાનની રાજધાની ઈસ્લામાબાદમાં પણ મોટા ધમાકાના અવાજ સંભળાયા હતા, જેનાથી પાકિસ્તાનમાં ભયનો માહોલ સર્જાયો હતો.
ભારતના વિદેશ સચિવ વિક્રમ મિસરીએ વધુમાં જણાવ્યું હતું કે પાકિસ્તાને અગાઉ એલઓસી પર ભારે ગોળીબાર અને ઘૂસણખોરીના અનેક નિષ્ફળ પ્રયાસો કર્યા હતા, જેના જવાબમાં ભારતીય સેનાએ હંમેશા સંયમ જાળવીને ચોક્કસ અને લક્ષ્યાંકિત કાર્યવાહી કરી હતી. કર્નલ સોફિયા કુરેશીએ માહિતી આપતા જણાવ્યું હતું કે પાકિસ્તાને ભારતના ૨૬ જેટલા સંવેદનશીલ સ્થળો પર હુમલા કરવાનો નિષ્ફળ પ્રયાસ કર્યો હતો, પરંતુ ભારતીય સેનાની સતર્કતા અને મજબૂત સંરક્ષણ પ્રણાલીને કારણે તેમના તમામ પ્રયાસો નિષ્ફળ રહ્યા હતા. તેમણે એમ પણ ઉમેર્યું હતું કે આ હુમલાઓમાં તુર્કીમાં નિર્મિત અત્યાધુનિક ડ્રોનનો ઉપયોગ કરવામાં આવ્યો હોવાના પ્રાથમિક પુરાવા મળ્યા છે, જેના જવાબમાં ભારતીય વાયુસેનાએ ત્વરિત કાર્યવાહી કરીને પાકિસ્તાનની સર્વેલન્સ રડાર સિસ્ટમને સંપૂર્ણપણે નષ્ટ કરી દીધી હતી.
અમેરિકાના વિદેશ સચિવ માર્કો રુબિયોએ આ ઘટનાક્રમમાં મહત્વની ભૂમિકા ભજવી હતી અને બંને દેશો વચ્ચે શાંતિ સ્થાપવા માટે સઘન પ્રયાસો કર્યા હતા. તેમણે ટ્વીટ કરીને માહિતી આપી હતી કે છેલ્લા ૪૮ કલાક દરમિયાન તેમણે ઉપરાષ્ટ્રપતિ જેડી વેન્સ સાથે મળીને ભારત અને પાકિસ્તાનના ઉચ્ચ સ્તરીય અધિકારીઓ, જેમાં વડાપ્રધાન નરેન્દ્ર મોદી, પાકિસ્તાનના વડાપ્રધાન શહેબાઝ શરીફ, ભારતના વિદેશ મંત્રી એસ. જયશંકર, પાકિસ્તાની સેના પ્રમુખ અસીમ મુનીર અને રાષ્ટ્રીય સુરક્ષા સલાહકાર અજિત ડોભાલ અને અસીમ મલિકનો સમાવેશ થાય છે, તેમની સાથે વિસ્તૃત વાતચીત કરી હતી.
તેમણે એ જાહેરાત કરતાં ખુશી વ્યક્ત કરી હતી કે બંને દેશોની સરકારો તાત્કાલિક યુદ્ધવિરામ માટે સંમત થઈ છે અને ભવિષ્યમાં તટસ્થ સ્થળે પરસ્પર વાતચીત દ્વારા તમામ વિવાદોનો ઉકેલ લાવવા અને કાયમી શાંતિ સ્થાપવા માટે પણ સહમત થઈ છે. તેમણે વડાપ્રધાન મોદી અને શરીફના શાંતિનો માર્ગ પસંદ કરવા બદલ તેમની સમજદારી, દૂરંદેશિતા અને નેતૃત્વની પ્રશંસા કરી હતી. આ યુદ્ધવિરામની જાહેરાતથી સરહદ પર શાંતિ સ્થપાશે અને બંને દેશોના નાગરિકોએ રાહતનો શ્વાસ લીધો હશે તેમ માનવામાં આવે છે.
