ભારતીય વાયુસેનાના ગ્રુપ કેપ્ટન શુભાંશુ શુક્લાએ આંતરરાષ્ટ્રીય અવકાશ મથક (ISS) પર Axiom-4 મિશન સફળતાપૂર્વક પૂર્ણ કરીને દેશને ગૌરવ અપાવ્યું છે.
તેમની સિદ્ધિ પર, સંરક્ષણ પ્રધાન રાજનાથ સિંહે શુભાંશુના પિતા એસડી શુક્લા સાથે ફોન પર વાત કરી અને તેમના સમગ્ર પરિવારને અભિનંદન આપ્યા. રાજનાથ સિંહે કહ્યું કે ‘આ મિશન માત્ર શુભાંશુની વ્યક્તિગત સિદ્ધિ જ નહીં, પરંતુ ભારતની વધતી જતી અવકાશ મહત્વાકાંક્ષાઓનું પ્રતીક પણ છે. આજે આખો દેશ તેમના પર ગર્વ અનુભવી રહ્યો છે
શુભાંશુ શુક્લાની આ અવકાશ યાત્રા ભારત માટે ઐતિહાસિક છે. તેઓ એક્સિઓમ-4 મિશન હેઠળ ISS પહોંચ્યા હતા. તમને જણાવી દઈએ કે તેમણે ત્યાં વિવિધ વૈજ્ઞાનિક પ્રયોગોમાં ભાગ લીધો હતો. તેમની સિદ્ધિએ માત્ર ભારતીય વાયુસેનાને જ નહીં પરંતુ સમગ્ર દેશને ગર્વ અપાવ્યો છે. આ મિશન ભારતના અવકાશ કાર્યક્રમની તાકાત દર્શાવે છે અને ભવિષ્યમાં આવી વધુ સિદ્ધિઓની આશા પણ જગાડે છે.
સંરક્ષણ મંત્રીએ શુભાંશુને તેમના ભવિષ્ય માટે શુભકામનાઓ પાઠવી અને કહ્યું કે તેમની સિદ્ધિ યુવાનો માટે પ્રેરણાનો સ્ત્રોત બનશે. તેમણે તેમના સોશિયલ મીડિયા એકાઉન્ટ ‘X’ પર ટ્વિટ કર્યું કે ‘શુભાંશુએ માત્ર અવકાશને સ્પર્શ કર્યો નથી પરંતુ ભારતની આકાંક્ષાઓને પણ નવી ઊંચાઈઓ પર પહોંચાડી છે. આ આપણા બધા માટે ગર્વની ક્ષણ છે.’ શુભાંશુની સિદ્ધિ પર દેશભરમાંથી અભિનંદનનો વરસાદ પડી રહ્યો છે. લોકો સોશિયલ મીડિયા પર તેમની પ્રશંસા કરી રહ્યા છે અને તેને અવકાશ ક્ષેત્રમાં ભારતના વધતા પગલાનું પ્રતીક ગણાવી રહ્યા છે.
એક્સિઓમ-૪ મિશનમાં ચાર દેશોના અવકાશયાત્રીઓની ટીમનો સમાવેશ થતો હતો. તેમાં ભારત, અમેરિકા, પોલેન્ડ અને હંગેરીના પ્રતિનિધિઓ હતા. આ મિશનમાં ૬૦ થી વધુ વૈજ્ઞાનિક પ્રયોગો અને ૨૦ થી વધુ જનસંપર્ક પ્રવૃત્તિઓ કરવામાં આવી છે. આ મિશનનું નેતૃત્વ પેગી વ્હિટસન કરી રહ્યા છે, જેમણે ૬૭૫ થી વધુ દિવસ અવકાશમાં વિતાવ્યા છે. શુક્લાએ સૂક્ષ્મ ગુરુત્વાકર્ષણમાં પાણીના વર્તન પર એક અનોખો પ્રયોગ પણ કર્યો હતો, જેમાં તેમણે પાણીના ટીપાના તરતા રહેવાનું પ્રદર્શન કર્યું હતું.
શુભાંશુ શુક્લા 41 વર્ષ પછી ભારતના બીજા અવકાશયાત્રી બન્યા છે. જેમણે અવકાશમાં જઈને ઇતિહાસ રચ્યો છે. 1984 માં રાકેશ શર્માએ સોવિયેત અવકાશયાનમાં ઉડાન ભરી હતી. શુક્લાનું આ મિશન ભારતના પ્રથમ માનવ અવકાશ ઉડાન મિશન ગગનયાન માટે પણ એક મહત્વપૂર્ણ પગલું છે. જે 2027 માં થવાનું છે. લખનૌમાં જન્મેલા શુક્લાએ તેમના મિશન દરમિયાન ઘણા અનોખા પ્રયોગો કર્યા છે, જે માનવ જીવન અને સૂક્ષ્મ ગુરુત્વાકર્ષણમાં જીવોના અસ્તિત્વ માટે ખૂબ જ મહત્વપૂર્ણ છે.
