સુરત શહેર ક્રાઈમ બ્રાંચ અને ડુમસ પોલીસે સંયુક્ત ઓપરેશન હાથ ધરી આંતરરાષ્ટ્રીય ડ્રગ્સ રેકેટનો પર્દાફાશ,સુરત એરપોર્ટ પર ૬ કરોડનું ડ્રગ્સ ઝડપાયું

ગુજરાત સરકારની “ડ્રગ્સ મુક્ત ગુજરાત” અને “ઝીરો ટોલરન્સ” પોલિસી અંતર્ગત સુરત શહેર ક્રાઈમ બ્રાંચ અને ડુમસ પોલીસે સંયુક્ત ઓપરેશન હાથ ધરી આંતરરાષ્ટ્રીય ડ્રગ્સ રેકેટનો પર્દાફાશ કર્યો છે. થાઈલેન્ડના બેંગકોકથી એર ઈન્ડિયા એક્સપ્રેસની ફ્લાઈટમાં કરોડોની કિંમતનું પ્રતિબંધિત ડ્રગ્સ ‘હાઈડ્રો વીડ’ (હાઈબ્રીડ ગાંજો) લઈને આવતા એક મહિલા સહિત બે આરોપીઓને સુરત ઇન્ટરનેશનલ એરપોર્ટ પરથી રંગેહાથ ઝડપી લેવામાં આવ્યા છે.

બાતમીના આધારે એરપોર્ટ પર ટ્રેપ
ડીસીપી ક્રાઈમ ભાવેશ રોજીયાને બાતમી મળી હતી કે ચેન્નઈના બે રહેવાસીઓ બેંગકોકથી ફ્લાઈટ નંબર IX-263 માં નશીલા પદાર્થનો જથ્થો લઈને સુરત આવી રહ્યા છે. આ બાતમીના આધારે ક્રાઈમ બ્રાંચ, ડુમસ પોલીસ, CISF, DRI અને AIU દ્વારા સંયુક્ત ઓપરેશન ગોઠવીને એરપોર્ટ પર તપાસ હાથ ધરાઈ હતી. ફ્લાઈટમાંથી ઉતરેલા પેસેન્જરોની શંકાસ્પદ હિલચાલને જોતા તેમની ચેક-ઇન લગેજ ટ્રોલી બેગ તપાસતા ઉપર-નીચેના ગુપ્ત ખાનાઓમાંથી ૧૭ કિલો ૬૫૮ ગ્રામ હાઈડ્રો વીડ મળી આવ્યું હતું.
પકડાયેલા આરોપીઓના નામ અને વિગત
૧. મોહમ્મદ ઇકબાલ અહેમદ ખાન (ઉ.વ. ૫૧, રહે. ચેન્નઈ, તમિલનાડુ)
૨. રાસીયા અબ્દુલ કપુર (ઉ.વ. ૫૩, રહે. વેલોર, તમિલનાડુ અને મલેશિયા)
૩. તમીમ ઈબ્રાહિમ અન્સારી (ઉ.વ. ૪૨, રહે. કાંચીપુરમ, તમિલનાડુ) – આ આરોપી એરપોર્ટ બહાર ડ્રગ્સનો જથ્થો લેવા આવ્યો હતો.
આ ઉપરાંત, આ સિન્ડિકેટના મુખ્ય સૂત્રધાર મોહમ્મદ અલી અને મોહમ્મદ ઈબ્રાહિમ (બંને રહે. ચેન્નઈ, હાલ બેંગકોક) ને વોન્ટેડ જાહેર કરવામાં આવ્યા છે.
જપ્ત કરાયેલ મુદ્દામાલ
* હાઈડ્રો વીડ (હાઈબ્રીડ ગાંજો): ૧૭ કિલો ૬૫૮ ગ્રામ (કિંમત ₹૬,૧૮,૦૩,૦૦૦)
* મોબાઈલ ફોન અને રોકડ: બે ફોન અને રોકડા ₹૧૧૫૦
* અન્ય: ૪ ટ્રોલી બેગ, પાસપોર્ટ અને આઈડી કાર્ડ
કુલ મુદ્દામાલની કિંમત: ₹૬,૧૮,૨૪,૧૫૦.
શાંતિથી સ્કેનિંગ બચવા માટેની મોડસ ઓપરેન્ડી
આંતરરાષ્ટ્રીય ડ્રગ્સ માફિયાઓ એરપોર્ટ પર સ્કેનિંગથી બચવા માટે ટ્રોલી બેગના ગુપ્ત ખાનામાં કાર્બન પેપર અને સ્પેશિયલ કોથળીઓનો ઉપયોગ કરતા હતા જેથી મશીનમાં ડ્રગ્સ પકડાય નહીં. પકડાયેલા આરોપીઓ અગાઉ શ્રીલંકા, થાઈલેન્ડ, મલેશિયા અને સાઉદી અરેબિયાની મુસાફરી કરી ચૂક્યા છે, જે તેમનું મજબૂત આંતરરાષ્ટ્રીય નેટવર્ક સૂચવે છે.

શું છે આ હાઈડ્રો વીડ?
હાઈડ્રો વીડ એ હાઈડ્રોપોનિક્સ પદ્ધતિથી માટી વિના ઉગાડવામાં આવતો ખાસ પ્રકારનો ગાંજો છે. આ પદ્ધતિમાં તાપમાન અને પ્રકાશ પર ચોક્કસ નિયંત્રણ રાખીને ઉગાડવામાં આવતી કેનાબીસમાં THC નું સ્તર ખૂબ ઊંચું હોય છે, જે તેને સામાન્ય ગાંજા કરતા વધુ શક્તિશાળી અને નશીલો બનાવે છે. આ જ કારણે આંતરરાષ્ટ્રીય બજારમાં તેની કિંમત કરોડોમાં હોય છે.
ડીસીબી પોલીસ સ્ટેશનમાં NDPS એક્ટ હેઠળ ગુનો નોંધીને ફરાર આરોપીઓને પકડવા માટે વધુ તપાસ હાથ ધરવામાં આવી છે.