દિલ્હી પોલીસના સ્પેશિયલ સેલે પાકિસ્તાની ગુપ્તચર એજન્સી ISI દ્વારા સંચાલિત શહઝાદ ભટ્ટી મોડ્યુલના ૯ સક્રિય સભ્યોની ધરપકડ કરીને એક ભયાનક આતંકી હુમલાની યોજનાને નિષ્ફળ બનાવી છે. આ આતંકવાદીઓના નિશાના પર દિલ્હીનું એક અતિ પ્રાચીન અને ઐતિહાસિક મંદિર હતું, જ્યાં તેઓ સુરક્ષાકર્મીઓ પર અંધાધૂંધ ગોળીબાર કરીને મોટી જાનહાનિ કરવાની ફિરાકમાં હતા. પૂછપરછમાં જાણવા મળ્યું છે કે આતંકીઓએ મંદિરની ઝીણવટભરી રેકી કરી તેના વીડિયો પાકિસ્તાન બેઠેલા હેન્ડલર્સને મોકલી દીધા હતા.
આતંકીઓના કાવતરામાં માત્ર ધાર્મિક સ્થળો જ નહીં, પરંતુ સામાન્ય નાગરિકોની ભીડવાળી જગ્યાઓ પણ સામેલ હતી. દિલ્હી-સોનીપત હાઈવે પર આવેલા એક અત્યંત પ્રખ્યાત ઢાબા પર હેન્ડ ગ્રેનેડ ફેંકીને સેંકડો લોકોને મોતના ઘાટ ઉતારવાનો તેમનો મનસૂબો હતો. આ ઉપરાંત, હરિયાણાના હિસારમાં આવેલી લશ્કરી છાવણી અને ઉત્તર પ્રદેશના કેટલાક પોલીસ સ્ટેશનો પર પણ હુમલો કરવા માટે આ મોડ્યુલે સંપૂર્ણ બ્લૂપ્રિન્ટ તૈયાર કરી લીધી હતી, પરંતુ સમયસરની કાર્યવાહીએ આ મોટી આફત ટાળી દીધી છે.
પોલીસે ધરપકડ કરાયેલા આરોપીઓ પાસેથી ભારે માત્રામાં હથિયારો અને વિસ્ફોટકો જપ્ત કર્યા છે. તપાસમાં બહાર આવ્યું છે કે ISI આ મોડ્યુલ દ્વારા ભારતમાં અરાજકતા ફેલાવવા અને સુરક્ષા દળોના મનોબળને તોડવા માંગતું હતું. હાલમાં સ્પેશિયલ સેલ આ આતંકીઓના નેટવર્કને જડમૂળથી ઉખેડી નાખવા માટે દિલ્હી સહિત અનેક રાજ્યોમાં દરોડા પાડી રહી છે અને તેમના સ્થાનિક સંપર્કોની શોધખોળ કરી રહી છે
