સમગ્ર દેશ વિવિધ રીતે સ્વતંત્રતા દિવસ ઉજવી રહ્યો છે ત્યારે ગુજરાતની પ્રથમ સ્કાય ડાઈવરે 14000 ફૂટની ઉંચાઈએથી સ્કાય ડાઇવિંગ કરી ઝંડો ફરકાવી દેશ પ્રેમ વ્યક્ત કર્યો હતો. સમગ્ર દેશમાં વિવિધ લોકો પોત પોતાની રીતે અનોખી રીતે દેશ પ્રેમ વ્યક્ત કરી રહ્યા છે. ત્યારે દેશની ચોથી અને ગુજરાતની એક માત્ર લાયસન્સ ધારક સ્કાય ડાઈવર શ્વેતા પરમારે ગત પાંચમી ઓગસ્ટના રોજ રશિયા ખાતે 14 હજાર ફૂટની ઊંચાઈએથી જમ્પ કરી ગરવી ગુજરાત લખેલો ઝંડો લહેરાવી દેશ પ્રેમ વ્યક્ત કર્યો હતો અને ગરવી ગુજરાત લખેલો ધ્વજ આકાશમાં લહેરાવી ગુજરાતી હોવાનો ગર્વ પણ વ્યક્ત કર્યો હતો.
શ્વેતા પરમાર હાલ દેશમાં એક માત્ર એક્ટિવ મહિલા સ્કાય ડાઈવર છે. તેનું સપનું છે કે જે રીતે વિદેશમાં સ્કાય ડાઈવરની કોમ્પિટિશન હોય છે તેવી કોમ્પિટિશન આપણા દેશમાં પણ યોજાય. તે માટે સરકારે વિચારવું જોઈએ.
તેમણે કહ્યું કે, પ્રધાનમંત્રી નરેન્દ્ર મોદીના આવ્યા બાદ નેશનલ એરો સ્પોર્ટ પોલિસી લાવ્યા બાદ અમારા જેવા ડાઈવરો પ્રોત્સાહિત થયા છે એના પહેલા કોઈ સ્કોપ જ નહોતો.જો સરકાર મદદ કરે તો શ્વેતા વિના મૂલ્યે યુવતીઓ અને યુવકને મફત સ્કાય ડાઇવિંગ શીખવાડવા તૈયાર છે. શ્વેતાનું કહેવું છે કે સ્કાય ડાઇવિંગનો ડ્રેસ અને પેરાશૂટ વિદેશમાં મળતા હોવાથી મોંઘા છે. 8થી 10 લાખની કિંમત છે તેથી સામાન્ય લોકો તેને ખરીદી શકતા નથી.
