ICC મહિલા T20 વર્લ્ડ કપ 2023માં ભારતને ઓસ્ટ્રેલિયા સામે 5 રનથી હારનો સામનો કરવો પડ્યો હતો. કેપટાઉનમાં રમાયેલી મેચમાં ઓસ્ટ્રેલિયાએ ભારતીય ટીમ સામે 173 રનનો લક્ષ્યાંક રાખ્યો હતો, પરંતુ તે નિર્ધારિત ઓવરમાં આઠ વિકેટે 167 રન જ બનાવી શકી હતી. આ હાર સાથે જ ટીમ ઈન્ડિયાનું ફરી એકવાર વર્લ્ડ ટાઈટલ જીતવાનું સપનું તૂટી ગયું છે. હવે ઓસ્ટ્રેલિયન ટીમ ફાઈનલ મેચમાં દક્ષિણ આફ્રિકા અથવા ઈંગ્લેન્ડ સામે ટકરાશે.
હરમનપ્રીત કૌરનો રનઆઉટ
ટીમ ઈન્ડિયા આ મેચમાં એક સમયે જીત તરફ આગળ વધી રહી હતી, પરંતુ કેપ્ટન હરમનપ્રીત કૌર,52 રનના રનઆઉટે મેચને ફેરવી દીધી હતી. ભારતીય ઇનિંગ્સની 15મી ઓવરમાં હરમનપ્રીત બીજો રન લેવાના પ્રયાસમાં રનઆઉટ થઈ હતી. જો જોવામાં આવે તો હરમનપ્રીત કૌર ખૂબ જ કમનસીબ હતી અને બીજો રન લેતી વખતે બેટ ફસાઈ ગયું જેના કારણે તે ક્રિઝ સુધી પહોંચી શકી ન હતી. જ્યારે હરમનપ્રીત રમી રહી હતી ત્યારે ભારતને 33 બોલમાં માત્ર 41 રનની જરૂર હતી, પરંતુ તેની આઉટ એ ટર્નિંગ પોઈન્ટ હતો.
એમએસ ધોની જેવુ થયુ
હરમનપ્રીત કૌરના રન આઉટથી ચાહકોને ટીમ ઈન્ડિયાના પૂર્વ કેપ્ટન એમએસ ધોનીની યાદ આવી ગઈ છે. એમએસ ધોની ન્યુઝીલેન્ડ સામે 2019 વર્લ્ડ કપ સેમિફાઇનલમાં રનઆઉટ થયો હતો. તે મેચમાં ભારત 240 રનના લક્ષ્યનો પીછો કરી રહ્યું હતું અને ધોની 50 રન પર બેટિંગ કરી રહ્યો હતો. ત્યારબાદ માર્ટિન ગુપ્ટિલ સીધા થ્રો પર રનઆઉટ થયો હતો. ધોનીના રનઆઉટ બાદ ભારત તે મેચ પણ હારી ગયું હતું. હવે અડધી સદી ફટકાર્યા બાદ હરમનપ્રીત પણ ધોનીની જેમ રન આઉટ થઈ જેનાથી ભારતીય ચાહકોનું સપનું તૂટી ગયું.
પૂર્વ ઓપનર વીરેન્દ્ર સેહવાગે 2019ની તે ઘટનાનો ફોટો શેર કર્યો અને લખ્યું, ‘ક્રિઝ પર મેચ વિનર અને સેમી ફાઇનલમાં રનઆઉટ. તે પહેલા પણ અમારા હૃદયને તોડી ચૂક્યું છે. ભારતને રન આઉટ થવાનું દુખ લાગ્યું. અમે રમત જીતી રહ્યા હતા પરંતુ ઓસ્ટ્રેલિયાએ ફરી સાબિત કર્યું કે શા માટે તેમને હરાવવું મુશ્કેલ છે. ટીમ દ્વારા સરસ પ્રયાસ કરવામાં અવ્યો.
તે સેમિફાઇનલ મેચમાં એમએસ ધોની ક્રિઝ પર પહોંચવામાં એક ઇંચ ઓછો પડ્યો હતો. કેપટાઉનમાં હરમનપ્રીત અને જેમિમાહ રોડ્રિગ્સની જેમ ધોની-રવીન્દ્ર જાડેજાએ તે મેચમાં ન્યૂઝીલેન્ડ સામેની ખરાબ શરૂઆત બાદ ભારતીય દાવને સંભાળ્યો હતો. જો કે, ન્યુઝીલેન્ડ સામેની તે ઇનિંગ્સ એમએસ ધોની માટે છેલ્લી સાબિત થઈ કારણ કે તેણે 15 ઓગસ્ટ 2020 ના રોજ એક વર્ષ પછી આંતરરાષ્ટ્રીય ક્રિકેટમાંથી નિવૃત્તિ લીધી.
એશ્લે ગાર્ડનરનું ઓલરાઉન્ડ પ્રદર્શન
મેચની વાત કરીએ તો ટોસ જીતીને પ્રથમ બેટિંગ કરતા ઓસ્ટ્રેલિયાની ટીમે ચાર વિકેટે 172 રન બનાવ્યા હતા. ઓપનર બેથ મૂનીએ 37 બોલમાં 54 રનની શાનદાર ઇનિંગ રમી હતી. તે જ સમયે, આક્રમક બેટિંગમાં નિષ્ણાત એશ્લે ગાર્ડનરે 18 બોલમાં 31 રન બનાવ્યા હતા, જ્યારે કેપ્ટન મેગ લેનિંગ 34 બોલમાં 49 રન બનાવીને અણનમ રહી હતી. જવાબમાં ટીમ ઈન્ડિયા આઠ વિકેટે 167 રન જ બનાવી શકી હતી. હરમનપ્રીત કૌરે 52 અને જેમિમા રોડ્રિગ્ઝે 43 રન બનાવ્યા હતા. એશ્લે ગાર્ડનરે બોલિંગ વખતે પણ બે વિકેટ લીધી અને તે પ્લેયર ઓફ ધ મેચ રહી.
