રિઝર્વ બેંક ઓફ ઈન્ડિયાએ RBI પોલિસી જાહેર કરી છે. રિઝર્વ બેંકે હોમ, કાર લોન સહિત તમામ પ્રકારની લોન લેનારાઓને મોટી રાહત આપતા રેપો રેટમાં કોઈ ફેરફાર કર્યો નથી. રેપો રેટ 6.5% જ રહેશે. તમને જણાવી દઈએ કે સતત ત્રીજી વખત આરબીઆઈએ તેની દ્વિ-માસિક નાણાકીય નીતિમાં રેપો રેટમાં કોઈ ફેરફાર કર્યો નથી. મોંઘવારી પર અંકુશ મેળવવા માટે આરબીઆઈએ રેપો રેટ 2.5 ટકા વધારીને 6.5 ટકા કરી દીધો હતો. જેના કારણે લોન લેવી મોંઘી થઈ ગઈ છે. જેના કારણે લોકો પર EMIનો બોજ વધી ગયો છે. જોકે, આરબીઆઈએ રેપો રેટમાં વધારો કર્યો નથી પરંતુ વધતી મોંઘવારી અંગે ચિંતા વ્યક્ત કરી છે.
શાકભાજીના ભાવમાં વધારો થતાં મોંઘવારી વધી
RBIની મોનેટરી પોલિસીની જાહેરાત કરતા ગવર્નર શક્તિકાંત દાસે કહ્યું કે શાકભાજીના ભાવ વધવાને કારણે મોંઘવારી વધી છે. દાસે કહ્યું કે શાકભાજીના ભાવમાં વધારાને કારણે જુલાઈ અને ઓગસ્ટ મહિનામાં મોંઘવારી વધેલી રહેશે. તેમણે કહ્યું કે MPCના તમામ સભ્યો રેપો રેટમાં ફેરફારના પક્ષમાં ન હતા.
ભારતીય અર્થતંત્રની મજબૂત સ્થિતિ
આરબીઆઈ ગવર્નરે કહ્યું કે ભારતીય અર્થવ્યવસ્થાની સ્થિતિ મજબૂત રહી છે. કંપનીઓની બેલેન્સ શીટ મજબૂત છે. ગ્રામીણ માંગમાં સુધારો જોવા મળી રહ્યો છે. તેમણે કહ્યું કે વૈશ્વિક વ્યાજ દરો અત્યારે ઊંચા રહેશે. આરબીઆઈએ નાણાકીય વર્ષ 2024 માટે જીડીપી વૃદ્ધિનું અનુમાન 6.5% જાળવી રાખ્યું છે. આરબીઆઈએ જણાવ્યું કે સરકારી ખર્ચને કારણે રોકાણની ગતિ વધી છે.
ખાદ્ય ફુગાવો ચિંતાનો વિષય
ભારતીય અર્થતંત્રે ફુગાવાને નિયંત્રિત કરવામાં નોંધપાત્ર પ્રગતિ કરી છે, જોકે ખાદ્ય ફુગાવો ચિંતાનો વિષય છે. દ્વિમાસિક નાણાકીય નીતિ સમીક્ષાની જાહેરાત કરતાં દાસે જણાવ્યું કે વૈશ્વિક સ્તરે અનિશ્ચિતતાઓ છતાં ભારતીય અર્થતંત્રનો વિકાસ દર મજબૂત છે. દાસે જણાવ્યું કે નાણાકીય વર્ષ 2024માં મોંઘવારી દર 5.1% થી વધીને 5.4% થવાની ધારણા છે.
