ભારતીય મહિલા અંડર-૧૯ ટીમે ઈતિહાસ રચી નાખ્યો છે. ભારતીય ટીમે સતત બીજી વખત ટી૨૦ વર્લ્ડકપનો ખિતાબ જીત્યો છે. આ ટૂર્નામેન્ટ ૨૦૨૩ શરૂ થઈ હતી અને ભારતીય ટીમે પહેલી જ આવૃત્તિમાં જીત મેળવી હતી. તે સમયે શેફાલી વર્મા ટીમ ઈન્ડિયાની કેપ્ટન હતી. હવે બે વર્ષ બાદ ટૂર્નામેન્ટની બીજી આવૃતિમાં નિક્કી પ્રસાદની કપ્તાનીમાં ભારતીય ટીમ સતત બીજી વખત ચેમ્પિયન બની છે.
ટોસ જીતીને પ્રથમ બેટિંગ કરતા દક્ષિણ આફ્રિકાની ઈનિંગ ૨૦ ઓવરમાં ૮૨ રનમાં સમેટાઈ ગઈ હતી. જવાબમાં ટીમ ઈન્ડિયાએ ૧૧.૨ ઓવરમાં એક વિકેટ ગુમાવીને લક્ષ્ય હાંસલ કરી લીધું હતું. ગોંગાડી ત્રિષાએ ફાઇનલમાં ઓલરાઉન્ડ પ્રદર્શન કર્યું હતું. તેણે ત્રણ વિકેટ લેવા ઉપરાંત અણનમ ૪૪ રન પણ ફટકાર્યા હતા.
મહિલા અંડર-૧૯ ટી-૨૦ વર્લ્ડકપની ફાઈનલમાં ભારતીય બોલરોએ તબાહી મચાવી દીધી હતી. ભારતીય બોલરીએ દક્ષિણ આફ્રિકાની ટીમને ૨૦ ઓવરમાં ૫૨ રન સુધી રોકી દીધી હતી. ભારતને સતત બીજી વખત ચેમ્પિયન બનવા માટે માત્ર ૮૩ રનનો લક્ષ્યાંક મળ્યો હતો. દક્ષિણ આફ્રિકાની કેપ્ટન કાચલા રેનેકે ટોસ જીતીને પ્રથમ બેટિંગ કરવાનો નિર્ણય કર્યો હતો. જોકે તેનો નિર્ણય ખોટો સાબિત થયો હતો. ટીમની શરૂઆત ખરાબ રહી હતી. કુઆલાલંપુરના બ્યુમાસ ઓવલ સ્ટેડિયમમાં રમાઈ રહેલી મેચમાં દક્ષિણ આફ્રિકાની ટીમના ચાર ખેલાડીઓ તો ખાતુ પણ ખોલાવી શકયા ન હતાં.
ભારત તરફથી ગોંગાડી ત્રિષાએ સૌથી વધુ ત્રણ વિકેટ લીધી હતી. જયારે પારુણિકા સિસોદિયા, આયુષી શુક્લા અને વૈષ્ણવી શર્માને બે-બે વિકેટ મળી હતી. શબનમ શકીલને એક વિકેટ મળી હતી.
