UPI (યુનિફાઇડ પેમેન્ટ્સ ઇન્ટરફેસ) ફરી એકવાર સમસ્યાનો સામનો કરી રહ્યું છે. આના કારણે, હજારો વપરાશકર્તાઓને ચુકવણી કરવામાં અને પૈસા ટ્રાન્સફર કરવામાં સમસ્યાઓનો સામનો કરવો પડી રહ્યો છે. આ આઉટેજની અસર ગૂગલ પે, પેટીએમ અને ફોનપે યુઝર્સને પણ થઈ છે. ડાઉનડિટેક્ટરના રિપોર્ટ મુજબ, બપોરે ૧૨ વાગ્યા સુધીમાં UPI સેવામાં વિક્ષેપની ફરિયાદોની સંખ્યા ૧ હજારને વટાવી ગઈ હતી. યુઝર્સે સોશિયલ મીડિયા પર પણ આ અંગે ફરિયાદ કરી હતી. છેલ્લા ૨૦ દિવસમાં ત્રીજીવાર UPIની સેવાઓમાં ખામી સર્જાઇ, આજે સમસ્યા સર્જાયા બાદ પુનઃસેવાઓ શરૂ થઇ હતી.
બપોરે ૧૨ વાગ્યાની આસપાસ ડાઉનડિટેક્ટર પર UPI ડાઉન હોવાની ફરિયાદો વધી ગઈ. સમાચાર લખાય ત્યાં સુધીમાં ફરિયાદોનો આંકડો ૨ હજારને વટાવી ગયો હતો. ડાઉનડિટેક્ટર વેબસાઇટ પરના લાઇવ ગ્રાફ મુજબ, બપોરે ૧:૦૧ વાગ્યા સુધીમાં, કુલ ૨,૩૩૩ વપરાશકર્તાઓએ UPI ડાઉન હોવાની ફરિયાદ કરી છે.
ડાઉનડિટેક્ટર અનુસાર, ૮૧ ટકા વપરાશકર્તાઓએ ચુકવણી અંગે ફરિયાદ કરી હતી. દરમિયાન, ૧૭ ટકા વપરાશકર્તાઓએ ફંડ ટ્રાન્સફરમાં સમસ્યાઓ અને ૨ ટકા લોકોએ ખરીદીમાં સમસ્યાઓની જાણ કરી.રિપોર્ટ મુજબ, આ આઉટેજથી ઘણી બેંકો અને પ્લેટફોર્મના વપરાશકર્તાઓ પ્રભાવિત થયા છે.
ડાઉનડિટેક્ટર બતાવે છે કે આ આઉટેજ બપોરે ૧૨ વાગ્યાની આસપાસ શરૂ થયો હતો. આ સમય દરમિયાન, Paytm, PhonePe અને Google Pay વપરાશકર્તાઓ UPI ચુકવણી કરી શકયા નહીં. આ દરમિયાન કેટલાક યુઝર્સે સોશિયલ મીડિયા પર પોસ્ટ પણ કરી. ભારતમાં UPI સેવા પૂરી પાડતી ઘણી એપ્સ છે. જેમાં બેંકિંગ એપ્સથી લઈને Paytm અને PhoePe સુધીના નામ શામેલ છે.
શનિવારે બપોરે ૧૨ વાગ્યાની આસપાસ લોકોએ ડાઉનડિટેક્ટર પર UPI સમસ્યાઓ વિશે જાણ કરવાનું શરૂ કર્યું. આ સમય દરમિયાન, UPI QR કોડ સ્કેન કર્યા પછી, વપરાશકર્તાઓ ચુકવણી પ્રક્રિયા જોઈ શકે છે, પરંતુ ૫ મિનિટ પછી પણ ચુકવણી પ્રક્રિયા પૂર્ણ થઈ રહી નથી. જોકે, આ આઉટેજ અંગે હજુ સુધી માહિતી જાહેર કરવામાં આવી નથી કે ભારતના કયા રાજ્યો તેનાથી પ્રભાવિત થયા છે.
થોડા દિવસો પહેલા, UPI સેવા ડાઉન થઈ ગઈ હતી જેના કારણે દેશભરના વપરાશકર્તાઓ UPI વ્યવહારો કરી શકયા ન હતા. ગયા મહિનાની ૨૬મી તારીખે, દેશભરમાં UPI વપરાશકર્તાઓને વ્યવહારો કરવામાં મુશ્કેલીઓનો સામનો કરવો પડ્યો. નેશનલ પેમેન્ટ્સ કોર્પોરેશન ઓફ ઈન્ડિયા (NPCI) એ આ પાછળનું કારણ તૂટક તૂટક ટેકનિકલ સમસ્યા હોવાનું જણાવ્યું હતું. UPI નેટવર્કનું સંચાલન કરતી NPCI એ આઉટેજની વાત સ્વીકારી અને થોડા સમયમાં ખામી દૂર થઈ ગઈ. આ પછી, ફરીથી ૨ એપ્રિલ, ૨૦૨૫ ના રોજ, સેંકડો વપરાશકર્તાઓએ ડાઉનડિટેક્ટર પર UPIઆઉટેજની જાણ કરી. આમાંથી લગભગ અડધા ફંડ ટ્રાન્સફર સાથે સંબંધિત હતા અને ૪૪ ટકા ચુકવણી નિષ્ફળતા સાથે સંબંધિત હતા
