તમિલનાડુના કરુરમાં શનિવારે અભિનેતા અને તમિલનાડુ વેટ્ટી કઝગમ (TVK)ના વડા વિજયની ચૂંટણી રેલી દરમિયાન એક ભયાનક ભાગદોડ મચી ગઈ હતી. ભીડના અસહ્ય દબાણને કારણે બાળકો સહિત અનેક લોકો બેભાન થઈ ગયા. અકસ્માતમાં અત્યાર સુધીમાં 36 લોકોનાં મોતની પુષ્ટિ થઈ છે અને મૃત્યુઆંક વધવાની શક્યતા છે. પરિસ્થિતિ વણસી રહી હોવાથી વિજયને પોતાનું ભાષણ અટકાવવું પડ્યું હતું.
અહેવાલ મુજબ, રેલીમાં 10,000 ચાહકોની અપેક્ષા હતી, પરંતુ વિજયની એક ઝલક જોવા માટે 50,000 થી વધુ ચાહકો ઉમટી પડ્યા હતા, જેને કારણે આ વિનાશ સર્જાયો.
રાજ્ય સરકારની જાહેરાત
મુખ્યમંત્રી એમકે સ્ટાલિને આ ઘટના પર ઊંડું દુઃખ વ્યક્ત કર્યું અને તાત્કાલિક રાહતની જાહેરાતો કરી:
વળતર: અકસ્માતમાં જીવ ગુમાવનારાઓના પરિવારોને મુખ્યમંત્રી રાહત ભંડોળમાંથી ₹10 લાખ નું વળતર આપવામાં આવશે.
તપાસ પંચ: સરકારે ઘટનાની નિષ્પક્ષ તપાસ કરવા માટે તપાસ પંચની રચના કરવાની જાહેરાત કરી છે, જેનું નેતૃત્વ નિવૃત્ત હાઈકોર્ટના ન્યાયાધીશ જસ્ટિસ અરુણા જગદીસન કરશે.
મુખ્યમંત્રી સ્ટાલિને આજે સ્થળની મુલાકાત લેવાની પણ જાહેરાત કરી છે.
રાષ્ટ્રીય નેતાઓ અને અન્ય લોકોએ આ દુર્ઘટના પર દેશભરમાંથી શોક વ્યક્ત કરવામાં આવ્યો છે:
રાષ્ટ્રપતિ દ્રૌપદી મુર્મુ અને વડાપ્રધાન નરેન્દ્રભાઈ મોદીએ શોક વ્યક્ત કર્યો.
ગૃહમંત્રી અમિતભાઈ શાહે પરિસ્થિતિની સમીક્ષા કરવા માટે CM સ્ટાલિન અને રાજ્યપાલ સાથે ફોન પર વાત કરી અને કેન્દ્ર તરફથી સંપૂર્ણ સહાયની ખાતરી આપી.
કોંગ્રેસ મહાસચિવ પ્રિયંકા ગાંધી વાડ્રા અને સંરક્ષણ પ્રધાન રાજનાથ સિંહે પણ સંવેદના વ્યક્ત કરી.
તમિલ સુપરસ્ટાર રજનીકાંત અને અભિનેતા કમલ હાસને ઘટનાને હૃદયદ્રાવક ગણાવી.
રાજકીય પ્રતિક્રિયા અને સુરક્ષા પર સવાલો
ભાજપ નેતા કે. અન્નામલાઈએ DMK સરકાર અને પોલીસ પર સુરક્ષા વ્યવસ્થાના અભાવ અને વીજળી ગુલ થવાના અહેવાલો પર આકરા પ્રહારો કર્યા.
PMK પ્રમુખ અંબુમણી રામદાસે દુર્ઘટનાની ઉચ્ચ સ્તરીય તપાસની માંગ કરી અને રેલીની વ્યવસ્થા તથા પોલીસ ભીડ નિયંત્રણને જવાબદાર ઠેરવ્યું.
ભાગદોડ બાદ પોલીસે ભીડને કાબૂમાં લેવા લાઠીચાર્જ કરવો પડ્યો હતો, અને ઘાયલોને તાત્કાલિક હોસ્પિટલમાં દાખલ કરવામાં આવ્યા હતા. આ ઘટનાએ ચૂંટણી રેલીઓના આયોજન અને સુરક્ષા વ્યવસ્થા પર ગંભીર સવાલો ઉભા કર્યા છે.
