અમદાવાદના પોશ વિસ્તારમાં ધમધમતા વધુ એક આંતરરાષ્ટ્રીય સાયબર ક્રાઈમ નેટવર્કનો પર્દાફાશ કરતા પોલીસે મુખ્ય સૂત્રધાર ફાલ્ગુન પટેલ સહિતના સાગરીતોની ધરપકડ કરી છે. આ ટોળકી કેનેડાના નાગરિકોને નિશાન બનાવી ‘કેનેડા રેવન્યુ એજન્સી’ના નકલી અધિકારી તરીકે ઓળખ આપી ટેક્સ ફ્રી સેવિંગ્સ એકાઉન્ટ (TFSA) ના નામે છેતરપિંડી આચરતી હતી. પોલીસ તપાસમાં બહાર આવ્યું છે કે ફાલ્ગુન પટેલ અગાઉ ઉદયપુર અને ચંદીગઢમાં પણ આવા જ કોલ સેન્ટરો ચલાવી ચૂક્યો છે, જે પૈકી ઉદયપુર દરોડામાં તેનો સાથી હર્ષ પટેલ ઝડપાયો હતો.
આ કૌભાંડમાં શિવમ દસમા નામનો શખ્સ બેંકિંગ વિગતો મેળવતો હતો, જ્યારે ઠગાઈ દ્વારા મેળવેલા નાણાંને ફાલ્ગુન પટેલ ચાઈનીઝ કનેક્શન દ્વારા હવાલા મારફતે સગેવગે કરતો હોવાની આશંકા છે. ફેબ્રુઆરી મહિનાથી સક્રિય આ ગેંગની મોડસ ઓપરેન્ડી અને નાણાકીય લેવડદેવડ અંગે સાયબર સેલ વધુ ઉંડી તપાસ ચલાવી રહી છે.
આ પ્રકારના સાયબર સ્કેમમાં ઠગો અત્યંત ચાલાકીભરી મોડસ ઓપરેન્ડી અપનાવે છે, તેઓ સૌ પ્રથમ ડેટા બ્રોકર્સ પાસેથી વિદેશી નાગરિકોના ફોન નંબર અને પ્રાથમિક વિગતો મેળવે છે. ત્યારબાદ, તેઓ VoIP (વોઈસ ઓવર ઈન્ટરનેટ પ્રોટોકોલ) ટેકનોલોજીનો ઉપયોગ કરી કેનેડા જેવા દેશોના લોકલ નંબર પરથી કોલ કરે છે અને પોતાની ઓળખ રેવન્યુ એજન્સી (CRA) ના સત્તાવાર અધિકારી તરીકે આપે છે. આ ઠગો ટેક્સ ફ્રી સેવિંગ્સ એકાઉન્ટ (TFSA) માં ગરબડ હોવાનું કહી સામેવાળી વ્યક્તિને ધરપકડ કે દેશનિકાલની ધમકી આપી ડરાવે છે. એકવાર ભોગ બનનાર વ્યક્તિ ગભરાઈ જાય, એટલે તેની પાસેથી બેંકિંગ વિગતો, સોશિયલ ઇન્શ્યોરન્સ નંબર અને અન્ય ખાનગી માહિતી પડાવી લેવામાં આવે છે. છેતરપિંડી દ્વારા મેળવેલા આ નાણાંને ચાઈનીઝ કનેક્શન કે ક્રિપ્ટોકરન્સી દ્વારા હવાલા મારફતે સગેવગે કરી દેતા હોય છે જેથી પોલીસને નાણાકીય ટ્રેલ શોધવામાં મુશ્કેલી પડે.
આવા આંતરરાષ્ટ્રીય કૌભાંડોથી બચવા માટે જાગૃત રહેવું અનિવાર્ય છે અને હંમેશા યાદ રાખવું જોઈએ કે કોઈપણ દેશની સરકારી સંસ્થા ક્યારેય ફોન પર કે મેસેજ દ્વારા તાત્કાલિક દંડ ભરવાની કે ધરપકડ કરવાની ધમકી આપતી નથી. જો કોઈ વ્યક્તિ ગિફ્ટ કાર્ડ, બિટકોઈન કે વાયર ટ્રાન્સફર જેવા અસામાન્ય માધ્યમોથી પેમેન્ટ કરવાનું દબાણ કરે, તો તે 100% છેતરપિંડીનો સંકેત છે. ટેક્સ રિફંડ કે એકાઉન્ટ વેરિફિકેશન માટે આવતી અજાણી લિંક્સ પર ક્યારેય ક્લિક ન કરવી જોઈએ અને શંકાસ્પદ કોલ આવતા જ તેને કાપીને સત્તાવાર હેલ્પલાઈન નંબર પર ખાતરી કરવી જોઈએ. તમારી અંગત કે નાણાકીય માહિતી અજાણ્યા વ્યક્તિ સાથે શેર ન કરવી એ સાયબર સુરક્ષાનું પ્રથમ પગથિયું છે.
