નવરાત્રી દરમિયાન કારમાં બેઠેલા યુગલના ફોટો-વીડિયો વાયરલ કરવાની ધમકી આપી નાણાં પડાવ્યા હોવાની ફરિયાદ, અગાઉ પણ આરોપી સામે નોંધાયો હતો ગુનો
અમદાવાદના સાબરમતી રિવરફ્રન્ટ પર ફરવા આવતા પ્રેમી યુગલોને નિશાન બનાવી ફોટો અને વીડિયો વાયરલ કરવાની ધમકી આપીને નાણાં પડાવવાની વધુ એક ઘટના સામે આવી છે. રિવરફ્રન્ટ વિસ્તારમાં યુગલોને ડરાવી-ધમકાવી ખંડણી વસૂલવાના આરોપસર ગોમતીપુરના હુસૈન શેખ સામે વધુ એક ફરિયાદ નોંધાઈ છે. આરોપીએ યુવક પાસેથી રૂ. 10 હજાર પડાવ્યા હોવાનો આક્ષેપ છે.
પ્રાપ્ત વિગતો અનુસાર, ગોમતીપુર વિસ્તારમાં રહેતો હુસૈન શેખ રિવરફ્રન્ટ પર આવતા યુગલો પર નજર રાખતો હતો અને તેમને ફોટો-વીડિયો વાયરલ કરવાની ધમકી આપીને નાણાં પડાવતો હોવાનો આરોપ છે. ગત નવરાત્રી દરમિયાન એક યુવક પોતાની મહિલા મિત્ર સાથે મોડી રાત્રે રિવરફ્રન્ટ વિસ્તારમાં કારમાં બેઠો હતો. આ દરમિયાન હુસૈન શેખ ત્યાં પહોંચ્યો હતો અને યુગલના ગુપ્ત રીતે ફોટા તથા વીડિયો પોતાના મોબાઈલમાં ઉતાર્યા હોવાનો દાવો કરીને તેમને ડરાવવાનું શરૂ કર્યું હતું.
આરોપીએ ફોટા અને વીડિયો સોશિયલ મીડિયા પર વાયરલ કરવાની તેમજ પરિવારજનો સમક્ષ બદનામ કરવાની ધમકી આપી યુવક પાસે રૂ. 10 હજારની માંગણી કરી હતી. બદનામીના ડરથી યુવકે આરોપીને નાણાં આપ્યા હોવાનો ફરિયાદમાં ઉલ્લેખ છે. જોકે, આટલેથી ન અટકતા આરોપીએ ત્યારબાદ યુવતી પાસે પણ વધુ નાણાંની માંગણી શરૂ કરી હતી. સતત થતી ઉઘરાણીથી કંટાળીને આખરે ભોગ બનનારે પોલીસનો સંપર્ક કર્યો હતો.
આ મામલે સાબરમતી રિવરફ્રન્ટ પોલીસે વધુ એક ફરિયાદ નોંધી તપાસ હાથ ધરી છે. ઉલ્લેખનીય છે કે, આરોપી સામે અગાઉ પણ આ પ્રકારના ગુનામાં કાર્યવાહી થઈ ચૂકી હોવાનું જાણવા મળે છે. હવે પોલીસ એ દિશામાં તપાસ કરી રહી છે કે આરોપીએ અગાઉ પણ અન્ય યુગલોને આ જ રીતે નિશાન બનાવ્યાં હતાં કે કેમ અને આ સમગ્ર ઘટનામાં અન્ય કોઈ વ્યક્તિની સંડોવણી છે કે નહીં.
રિવરફ્રન્ટની સુરક્ષા સામે સવાલ
અમદાવાદના સાબરમતી રિવરફ્રન્ટ પર દરરોજ મોટી સંખ્યામાં નાગરિકો અને પ્રવાસીઓ ફરવા આવે છે. ત્યારે યુગલોને બ્લેકમેલ કરી નાણાં પડાવવાના આક્ષેપો સામે આવતાં રિવરફ્રન્ટની સુરક્ષા વ્યવસ્થા અને પોલીસ પેટ્રોલિંગ અંગે પણ સવાલો ઊભા થયા છે. આવા બનાવો અટકાવવા માટે સંવેદનશીલ વિસ્તારોમાં સુરક્ષા અને દેખરેખ વધુ મજબૂત બનાવવાની જરૂરિયાત ઊભી થઈ છે.
