ઝિમ્બાબ્વેના હરારે સ્પોર્ટ્સ ગ્રાઉન્ડ પર ભારતીય યુવા બ્રિગેડે એવી ગર્જના કરી કે આખી દુનિયા જોતી રહી ગઈ. કેપ્ટન આયુષ મ્હાત્રેના નેતૃત્વમાં ટીમ ઇન્ડિયાએ અંડર-19 વર્લ્ડ કપ 2026ની ફાઇનલમાં ઇંગ્લેન્ડને 100 રનથી કચડી નાખીને રેકોર્ડબ્રેક છઠ્ઠી વખત ખિતાબ જીતી લીધો છે. મોહમ્મદ કૈફ, વિરાટ કોહલી અને પૃથ્વી શો જેવા દિગ્ગજોની યાદીમાં હવે આયુષ મ્હાત્રેનું નામ પણ સુવર્ણ અક્ષરે અંકાઈ ગયું છે.
વૈભવ સૂર્યવંશી: ક્રિકેટના નવા સુપરસ્ટારનો ઉદય
આ ફાઇનલ મેચના અસલી હીરો રહ્યા 14 વર્ષીય વૈભવ સૂર્યવંશી. આખા વર્લ્ડ કપમાં શાંત રહેલું વૈભવનું બેટ ફાઇનલમાં જાણે આગ ઓકતું હતું. વૈભવે માત્ર 80 બોલમાં 15 ચોગ્ગા અને 15 ગગનચુંબી છગ્ગાની મદદથી 175 રનની વિસ્ફોટક ઇનિંગ રમી હતી. આ સ્કોર અંડર-19 વર્લ્ડ કપની કોઈપણ ફાઇનલમાં કોઈ ખેલાડી દ્વારા કરવામાં આવેલો સર્વોચ્ચ વ્યક્તિગત સ્કોર છે. વૈભવે માત્ર 55 બોલમાં પોતાની સદી પૂરી કરી હતી અને 150 રન તો માત્ર બાઉન્ડ્રીથી ફટકાર્યા હતા.
ભારતનો રન પહાડ અને ઇંગ્લેન્ડનું પતન
ટોસ જીતીને પ્રથમ બેટિંગ કરતા ભારતે નિર્ધારિત 50 ઓવરમાં 9 વિકેટના નુકસાન પર 411 રનનો વિશાળ સ્કોર બનાવ્યો હતો. કેપ્ટન આયુષ મ્હાત્રેએ 53 રન અને અભિજ્ઞાન કુંડુએ 40 રનનું મહત્વનું યોગદાન આપ્યું હતું. 412 રનના હિમાલય જેવા લક્ષ્યનો પીછો કરવા ઉતરેલી ઇંગ્લેન્ડની ટીમ 40.2 ઓવરમાં 311 રન બનાવી ઓલઆઉટ થઈ ગઈ હતી. ઇંગ્લેન્ડ તરફથી ફોકનરે 63 બોલમાં સદી ફટકારી સંઘર્ષ કર્યો હતો, પરંતુ ભારતીય બોલરો સામે તે પૂરતું નહોતું. ભારત તરફથી ફાસ્ટ બોલર એમ્બ્રિસે સૌથી વધુ 3 વિકેટ ઝડપી હતી.
રેકોર્ડ્સની વણઝાર
વૈભવ સૂર્યવંશીએ આ મેચમાં અનેક રેકોર્ડ્સ તોડ્યા છે. તેણે દક્ષિણ આફ્રિકાના ડેવાલ્ડ બ્રેવિસના એક વર્લ્ડ કપમાં સૌથી વધુ છગ્ગા (18) મારવાના રેકોર્ડને 22 છગ્ગા સાથે તોડી નાખ્યો છે. આ ઉપરાંત તે અંડર-19 ક્રિકેટમાં સૌથી ઝડપી 150 રન (71 બોલ) બનાવનાર ખેલાડી પણ બની ગયો છે.
ભારતની આ જીત દર્શાવે છે કે દેશમાં ક્રિકેટનું ભવિષ્ય અત્યંત સુરક્ષિત અને તેજસ્વી હાથોમાં છે. વિજય બાદ સમગ્ર ભારતમાં દિવાળી જેવો માહોલ જોવા મળી રહ્યો છે
