સ્વદેશી વસ્તુઓનો ઉપયોગ, ભારતીય કારીગરોને પ્રોત્સાહન અને રાષ્ટ્રહિતમાં યોગદાન આપવાના હેતુથી અનોખી પહેલ
અમદાવાદ: દિવાળીના પર્વને ભારતીય પરંપરા અને સ્વદેશી ઉત્પાદનો સાથે જોડવાના ઉદ્દેશથી સનાતન યુવા ક્લબ દ્વારા એક સરાહનીય પહેલ કરવામાં આવી છે. વડાપ્રધાન નરેન્દ્ર મોદી દ્વારા પ્રેરિત સ્વદેશી અભિયાનને સાકાર કરવાના સંકલ્પ સાથે ક્લબના સભ્યોએ આ વર્ષે સ્વદેશી દિવાળી ઉજવવાનો નિર્ણય લીધો છે.
આ પહેલના ભાગરૂપે સનાતન યુવા ક્લબના સભ્યોએ સ્વદેશી માટીના દીવડાં ખરીદીને ભારતીય કારીગરો અને સ્થાનિક ઉત્પાદકોને પ્રોત્સાહન આપવાનો સંદેશ આપ્યો છે. આ અભિયાનનો મુખ્ય ઉદ્દેશ દિવાળીની ઉજવણીમાં વિદેશી વસ્તુઓના બદલે ભારતીય બનાવટની વસ્તુઓનો વધુમાં વધુ ઉપયોગ કરવાનો છે.
ક્લબના સભ્યોનું માનવું છે કે સ્વદેશી વસ્તુઓની ખરીદી માત્ર એક વ્યવહાર નથી, પરંતુ તે દેશની અર્થવ્યવસ્થાને મજબૂત બનાવવાની સાથે સ્થાનિક કારીગરોના જીવનમાં ખુશી લાવવાનું માધ્યમ પણ છે.
આ પહેલ દ્વારા લોકોને પણ અપીલ કરવામાં આવી છે કે દિવાળીના પર્વે સ્વદેશી દીવડાં અને ભારતીય બનાવટની વસ્તુઓ ખરીદીને દેશના નાના વેપારીઓ, કુંભાર સમાજ અને સ્થાનિક કારીગરોને આર્થિક રીતે સહયોગ આપે.
સ્વદેશી વસ્તુઓ અપનાવવી, ભારતીય કારીગરોને પ્રોત્સાહિત કરવા અને આત્મનિર્ભર ભારતના નિર્માણમાં સહભાગી બનવું એ જ આ સ્વદેશી દિવાળી અભિયાનનો મુખ્ય સંકલ્પ છે.
સ્વદેશી અપનાવો, ભારતીય કારીગરોને પ્રોત્સાહન આપો અને રાષ્ટ્રના વિકાસમાં સહભાગી બનો — એ જ સાચી સ્વદેશી દિવાળીની ઉજવણી છે.
