કેન્દ્ર સરકારે વીમા કંપનીઓ પર કડક વલણ અપનાવતા તાત્કાલિક અસરથી જીએસટી ઘટાડાનો સંપૂર્ણ લાભ પોલિસીધારકો સુધી પહોંચાડવાનો આદેશ આપ્યો છે. આ પગલું તાજેતરમાં જીએસટી કાઉન્સિલની ૫૬મી બેઠકમાં લેવામાં આવેલા એક ઐતિહાસિક નિર્ણય બાદ આવ્યું છે, જેમાં તમામ આરોગ્ય અને જીવન વીમા પોલિસીઓને ૧૮% ના સ્થાને ૦% જીએસટીની શ્રેણીમાં મૂકવામાં આવી છે.
નાણા મંત્રાલયના નાણાકીય સેવાઓ વિભાગના સચિવ એમ. નાગરાજુએ સરકારી અને ખાનગી વીમા કંપનીઓના ઉચ્ચ અધિકારીઓ સાથે બેઠક યોજી. આ બેઠકમાં તેમણે ભારપૂર્વક જણાવ્યું કે જીએસટી સુધારાની સકારાત્મક અસરોને પ્રમોટ કરવા અને પોલિસીધારકોને ઓછું પ્રીમિયમ મળે તે સુનિશ્ચિત કરવા માટે કંપનીઓએ સક્રિયપણે ઝુંબેશ ચલાવવી જોઈએ.
નાણા મંત્રાલયના નિવેદન અનુસાર, આ પગલાનો હેતુ વીમાને વધુ સુલભ અને સસ્તો બનાવવાનો છે, જેનાથી દેશભરમાં નાણાકીય સુરક્ષા અને વીમાની પહોંચ વધશે.
જાણો ગ્રાહકોને શું લાભ થશે?
• સસ્તું પ્રીમિયમ: અગાઉ ૧૮% જીએસટી લાગતો હતો, હવે તે શૂન્ય થવાથી આરોગ્ય અને જીવન વીમાનું પ્રીમિયમ ઘટશે. આનાથી ગ્રાહકોના ખિસ્સા પરનો બોજ ઓછો થશે.
• સુલભતામાં વધારો: ઓછા પ્રીમિયમથી વધુ લોકો વીમો ખરીદી શકશે, જેનાથી દેશમાં આરોગ્ય વીમાની પહોંચમાં સુધારો થશે. આનાથી હોસ્પિટલ ઉદ્યોગને પણ ફાયદો થવાની અપેક્ષા છે.
• લાંબા ગાળાના ફાયદા: આ નિર્ણય સરકારના આરોગ્ય સંભાળને વધુ સમાવેશી અને સસ્તું બનાવવાના વિઝન સાથે સુસંગત છે.
રેટિંગ એજન્સી ICRAના એક અહેવાલ મુજબ, આનાથી સ્ટેન્ડઅલોન આરોગ્ય વીમા કંપનીઓના નફા પર દબાણ આવી શકે છે, જો તેઓ સંપૂર્ણ લાભ ગ્રાહકો સુધી પહોંચાડે. તેમ છતાં, સરકારે સ્પષ્ટ કર્યું છે કે આ ફેરફારનો મુખ્ય ઉદ્દેશ ગ્રાહકોને લાભ આપવાનો છે, જેથી વીમો એક આવશ્યક જરૂરિયાત બની શકે, માત્ર વૈભવી વસ્તુ નહીં.
