એકતાનગર, નર્મદા: નર્મદા જિલ્લાના વૈશ્વિક પ્રવાસન સ્થળ સ્ટેચ્યુ ઓફ યુનિટી ખાતે આગામી તા. 22 સપ્ટેમ્બર, 2026ના રોજ 72મા રાષ્ટ્રીય ફિલ્મ પુરસ્કાર-2024નો ભવ્ય સમારોહ યોજાશે. ભારત સરકારના માહિતી અને પ્રસારણ મંત્રાલય દ્વારા આયોજિત આ પ્રતિષ્ઠિત સમારોહ રાષ્ટ્રીય ફિલ્મ પુરસ્કારના 70 વર્ષથી વધુના ઇતિહાસમાં પ્રથમ વખત દિલ્હીની બહાર યોજાઈ રહ્યો છે. ગુજરાતના એકતાનગર-કેવડિયાને આ ઐતિહાસિક સમારોહની યજમાની મળતાં સમગ્ર રાજ્ય અને નર્મદા જિલ્લા માટે આ ગૌરવની ક્ષણ બની છે.
ભારતીય સિનેમા જગતમાં ઉત્કૃષ્ટ યોગદાન આપનાર પ્રતિભાઓને સન્માનિત કરવા યોજાનારા આ રાષ્ટ્રીય સમારોહમાં કુલ 92 પુરસ્કાર વિજેતાઓને સન્માનિત કરવામાં આવશે. ભારતના મહામહિમ રાષ્ટ્રપતિ શ્રીમતી દ્રૌપદી મુર્મુના હસ્તે આશરે 75 મિનિટના ભવ્ય સમારોહમાં વિજેતાઓને રાષ્ટ્રીય ફિલ્મ પુરસ્કાર એનાયત કરવામાં આવશે.
સ્ટેચ્યુ ઓફ યુનિટી ખાતે વિશેષ ડોમ તૈયાર કરાશે
રાષ્ટ્રીય કક્ષાના આ મહત્વપૂર્ણ કાર્યક્રમ માટે સ્ટેચ્યુ ઓફ યુનિટી બસ-બે એરિયા ખાતે જર્મન એલ્યુમિનિયમ સ્ટ્રક્ચરલ ડોમ તૈયાર કરવામાં આવશે. કાર્યક્રમમાં અંદાજે 1,000 મહેમાનોની બેઠક ક્ષમતા સાથે જરૂરી માળખાકીય સુવિધાઓ તથા અન્ય વ્યવસ્થાઓ ઊભી કરવામાં આવશે.
કલેક્ટરની અધ્યક્ષતામાં આયોજન અંગે બેઠક
કાર્યક્રમનું સુચારૂં, શિસ્તબદ્ધ અને ગરિમાપૂર્ણ આયોજન થાય તે માટે નર્મદા જિલ્લા કલેક્ટર ગંગા સિંઘની અધ્યક્ષતામાં મહત્વપૂર્ણ બેઠક યોજાઈ હતી. બેઠકમાં કાર્યક્રમની વ્યવસ્થા, સુરક્ષા, પ્રોટોકોલ, મહાનુભાવોના આગમન અને પ્રસ્થાન, સ્થળ વ્યવસ્થા સહિતની વિવિધ તૈયારીઓ અંગે વિગતવાર ચર્ચા કરવામાં આવી હતી. સંબંધિત અધિકારીઓને જરૂરી માર્ગદર્શન પણ આપવામાં આવ્યું હતું.
રાષ્ટ્રીય કક્ષાના સમારોહથી નર્મદાની ઓળખ વધુ મજબૂત થશે
વિશ્વપ્રસિદ્ધ સ્ટેચ્યુ ઓફ યુનિટીની ભવ્ય પૃષ્ઠભૂમિમાં યોજાનાર આ રાષ્ટ્રીય સમારોહથી નર્મદા જિલ્લાને રાષ્ટ્રીય તેમજ આંતરરાષ્ટ્રીય સ્તરે વધુ એક આગવી ઓળખ મળવાની સંભાવના છે. દેશના પ્રતિષ્ઠિત ફિલ્મ પુરસ્કારો પૈકીના એક સમારોહની યજમાની કરવાની તક ગુજરાત અને ખાસ કરીને એકતાનગર-કેવડિયાને મળવી એ રાજ્ય માટે ગૌરવની બાબત છે.
મહામહિમ રાષ્ટ્રપતિની ઉપસ્થિતિ, ભારતીય સિનેમા જગતની જાણીતી પ્રતિભાઓની હાજરી અને સ્ટેચ્યુ ઓફ યુનિટીની વૈશ્વિક ઓળખ—આ ત્રણેયનો સંગમ કેવડિયામાં યોજાનારા આ સમારોહને યાદગાર અને ઐતિહાસિક બનાવશે.
આ ઐતિહાસિક કાર્યક્રમને ભવ્યતા, શિસ્ત અને સંપૂર્ણ ગરિમા સાથે સફળ બનાવવા માટે ગુજરાત સરકાર અને નર્મદા જિલ્લા વહીવટી તંત્ર દ્વારા સંકલિત આયોજન સાથે તૈયારીઓ હાથ ધરવામાં આવી રહી છે.
●70 વર્ષથી વધુના ઈતિહાસમાં પ્રથમ વખત દિલ્હીની બહાર રાષ્ટ્રીય ફિલ્મ પુરસ્કાર સમારોહ, એકતાનગર બનશે ઐતિહાસિક આયોજનનું કેન્દ્ર
● 22 સપ્ટેમ્બરે સ્ટેચ્યુ ઓફ યુનિટી ખાતે યોજાશે ભવ્ય સમારોહ, રાષ્ટ્રપતિ દ્રૌપદી મુર્મુના હસ્તે 92 વિજેતાઓનું સન્માન
● કેવડિયામાં 1,000 મહેમાનો માટે વિશેષ વ્યવસ્થા, જર્મન એલ્યુમિનિયમ સ્ટ્રક્ચરલ ડોમમાં યોજાશે રાષ્ટ્રીય કક્ષાનો કાર્યક્રમ
● રાષ્ટ્રપતિની હાજરી અને ફિલ્મ જગતની દિગ્ગજ પ્રતિભાઓના સંગમથી ઐતિહાસિક બનશે એકતાનગરમાં યોજાનારો સમારોહ
● નર્મદા માટે ગૌરવની ક્ષણ: સ્ટેચ્યુ ઓફ યુનિટીની ભવ્ય પૃષ્ઠભૂમિમાં પ્રથમવાર યોજાશે રાષ્ટ્રીય ફિલ્મ પુરસ્કાર સમારોહ
