દેશની પ્રથમ હાઈસ્પીડ બુલેટ ટ્રેનની રાહ જોઈ રહેલા મુસાફરો માટે મહત્વપૂર્ણ સમાચાર સામે આવ્યા છે. વર્ષ 2027ના અંતિમ ત્રિમાસિક ગાળામાં ગુજરાતમાં સુરતથી વાપી વચ્ચે પ્રથમ બુલેટ ટ્રેન સેવા શરૂ થવાની સંભાવના છે. ત્યારબાદ મુંબઈ-અમદાવાદ હાઈસ્પીડ રેલ કોરિડોરને તબક્કાવાર શરૂ કરવાની યોજના છે. આ અંગે રેલવે મંત્રી અશ્વિની વૈષ્ણવે પ્રોજેક્ટની પ્રગતિની વિગતો જાહેર કરી છે.
બુલેટ ટ્રેન પ્રોજેક્ટનું કેટલું કામ પૂર્ણ થયું?
રેલવે મંત્રીના જણાવ્યા અનુસાર, મુંબઈ-અમદાવાદ બુલેટ ટ્રેન પ્રોજેક્ટમાં અત્યાર સુધીમાં 456 કિલોમીટર સુધી પિલરનું બાંધકામ પૂર્ણ થયું છે. જ્યારે 371 કિલોમીટર વાયડક્ટનું નિર્માણ કરવામાં આવ્યું છે. આ ઉપરાંત 299 કિલોમીટરના વિસ્તારમાં આશરે 6 લાખ નોઈઝ બેરિયર લગાવવાની કામગીરી અને 206 કિલોમીટરના વાયડક્ટ પર 9,300 ઓવરહેડ ઇક્વિપમેન્ટ (OHE) માસ્ટ સ્થાપિત કરવાની કામગીરી પૂર્ણ થઈ છે.
આઠ સ્ટેશનોનું બાંધકામ પૂર્ણ, ફિનિશિંગની કામગીરી ચાલુ
પ્રોજેક્ટ અંતર્ગત આઠ સ્ટેશનોનું સિવિલ બાંધકામ પૂર્ણ થયા બાદ હાલમાં ફિનિશિંગનું કામ ચાલી રહ્યું છે. બીજી તરફ સાબરમતી, સુરત અને થાણે ખાતે રોલિંગ સ્ટોક ડિપો બનાવવાની કામગીરી પણ આગળ વધી રહી છે.
દરિયાની નીચેથી પસાર થશે બુલેટ ટ્રેન
આ પ્રોજેક્ટનું સૌથી મહત્વપૂર્ણ અને ટેકનિકલ રીતે પડકારજનક પાસું મહારાષ્ટ્રમાં બનાવવામાં આવતી 21 કિલોમીટર લાંબી સુરંગ છે. આ સુરંગનો આશરે 7 કિલોમીટરનો હિસ્સો થાણે ક્રીકની નીચેથી પસાર થશે. આ અંડર-સી ટનલના નિર્માણ માટે જુલાઈ 2026માં વિક્રોલી અને સાવલીથી 3,000 ટનથી વધુ વજન ધરાવતી બે ટનલ બોરિંગ મશીનો તૈનાત કરવામાં આવી છે.
ભારતમાં જ તૈયાર થશે સ્વદેશી બુલેટ ટ્રેન
બુલેટ ટ્રેન માટે સ્વદેશી ટ્રેનસેટ તૈયાર કરવાની કામગીરી પણ ચાલી રહી છે. રેલવે મંત્રીના જણાવ્યા અનુસાર, ઇન્ટિગ્રલ કોચ ફેક્ટરી (ICF) અને BEML દ્વારા 280 કિલોમીટર પ્રતિ કલાકની ઝડપે દોડી શકે તેવી B28 ટ્રેનસેટ તૈયાર કરવામાં આવી રહી છે. હાલમાં તેનું સ્ટ્રક્ચરલ ટેસ્ટિંગ ચાલી રહ્યું છે. ત્યારબાદ 350 કિલોમીટર પ્રતિ કલાકની ઝડપ માટે સક્ષમ B35 ટ્રેન તૈયાર કરવાની યોજના છે.
2027માં ટ્રેક ટ્રાયલ પર નજર
હવે બુલેટ ટ્રેન પ્રોજેક્ટ માટે 2027નું વર્ષ મહત્વપૂર્ણ બની શકે છે. મધ્ય 2027 સુધીમાં સંભવિત ટ્રેક ટ્રાયલ, સુરતથી વાપી વચ્ચે પ્રથમ તબક્કાની સેવા અને ત્યારબાદ સમગ્ર મુંબઈ-અમદાવાદ કોરિડોરને તબક્કાવાર શરૂ કરવાની પ્રક્રિયા પર સૌની નજર રહેશે.
જો નિર્ધારિત સમયમર્યાદા મુજબ કામગીરી આગળ વધશે તો ગુજરાતના મુસાફરોને દેશની પ્રથમ હાઈસ્પીડ બુલેટ ટ્રેનમાં મુસાફરી કરવાનો અવસર મળી શકે છે.
