અમદાવાદનાં ગોમતીપુર વિસ્તારની ટાબરીયા ગેંગનો આતંક સામે આવ્યો છે. અહી સીસીટીવી ફૂટેજનાં આધારે ગોમતીપુર પોલીસે વેપારીઓને પરેશાન કરનાર માથાભારે શખ્સોની ધરપકડ કરી.
છેલ્લા ઘણા સમયથી ટાબરિયા ગેંગ દ્વારા ગોમતીપુર અને આસપાસનાં વિસ્તારમાં વેપારીઓ પાસે યેનકેન રીતે રૂપિયા ઉઘરાવવામાં આવે છે. હવે વેપારી રૂપિયા આપવાની ના પાડે તો ચાકુ જેવું હથિયાર બતાવી અને ધમકી આપવામાં આવે છે તથા મારામારી પણ કરવામાં આવે છે. ટાબરીયા ગેંગ નશો કરતી હોવાનું પણ વેપારીઓની ફરિયાદમાં સામે આવ્યું છે.
વેપારીઓનાં વાહનમાં તોડફોડ કરવી અને સ્થાનિક વિસ્તારોમાં મારામારી અને દાદાગીરી કરવા જેવા ટાબરીયા ગેંગનાં અનેક કૃત્યો સામે આવ્યા છે. જેના પગલે વેપારીઓ સીસીટીવી ફૂટેજનાં પુરાવાનાં આધારે ગોમતીપુર પોલીસ સ્ટેશનમાં ફરિયાદ કરી હતી. જેમાં પોલીસે સતર્કતા દાખવી ગણતરીનાં કલાકોમાં ગેંગનાં બે આરોપીઓની ધરપકડ કરી વધુ તપાસ હાથધરી છે.
