અમરેલી જિલ્લામાં ઘરફોડ ચોરીના 25 ગુન્હાઓમાં સંડોવાયેલ તેમજ 8 ગુન્હાઓમાં મોસ્ટ વોન્ટેડ 10 હજાર રૂપિયાના ઈનામી આરોપીને અમરેલી એલસીબી ટીમ દ્વારા ઝડપી પાડી કાયદેસરની કાર્યવાહી હાથ ધરી હતી.
અમરેલી જિલ્લામાં અલગ-અલગ પોલીસ સ્ટેશનમાં ગંભીર ગુન્હાઓમાં સંડોવાયેલ ટોપ-10 નાસતા ફરતા આરોપી સીઆઇડી ક્રાઇમ અને રેલવેઝ દ્વારા જાહેર કરવામાં આવેલ યાદીમાં સામેલ રૂ.10 હજારના ઈનામી શખ્સ ભાયા કમરૂભાઈ પરુડીયા, મૂળ રહે.મધ્યપ્રદેશ હાલ વેરમડી,(તા.કરજણ) વાળાને અમરેલી એલસીબી દ્વારા ઝડપી પાડવામાં આવ્યો હતો.તેણે લીલીયા,અમરેલી સહિતના વિસ્તારોમાં અલગ-અલગ 25 ઘરફોડ ચોરીને તેના સાગરીતો સાથે અંજામ આપ્યો હતો તેમજ તે 8 ગુનાઓ છેલ્લા 7 વર્ષથી નાસતા ફરતા ફરતો હતો.
પોલીસ દ્વારા પૂછપરછ કરવામાં આવતા ચોંકાવનારો ખુલાસો થયો હતો,તેણે પોલીસને કબૂલાત આપી હતી કે,પોતે તથા તેના સાગરીતો જેમાં પારૂ ઉર્ફે કાળુ જુરસિંહ બામણીયા તથા કાળુ ઉર્ફે રમેશ ભુરસિંહ બામણીયા તથા કેરમા ઉર્ફે ભુરો નાકુ ભુરીયા સાથે મળી વર્ષ 2016ના વર્ષમાં જાત્રુડા ગામે ઘરફોડ ચોરી, લીલીયાના હરિપર ગામે ઘરફોડ ચોરી, અમરેલીમાં લાઠી રોડ ઉપર કે.કે.પાર્કમાં બે વખત ઘરફોડ ચોરી, લીલીયાના ગોઢાવદર ગામે ઘરફોડ ચોરી, લીલીયાના સનાળીયા ગામે ઘરફોડ ચોરી, અમરેલીમાં રણુજા ધામ સોસાયટીમાં બે વાર ઘરફોડ ચોરી, લીલીયાના મોટા કણકોટ ગામે ઘરફોડ ચોરી, લીલીયા ટાઉનમાં બંધ મકાનમાં ધરફોડ ચોરી, લીલીયાના અંટાળીયા ગામે વંડી ટપી ઘરમાંથી ચોરી, નાના લીલીયા ગામે બે મકાનોના તાળા તોડી ચોરી, મોટા લીલીયા ગામે ચારેક દુકાનોમાં ચોરી તેમજ બાબરા, ઉંટવડ, ધ્રોલ, ચરખા, આંબા, લીલીયા બાયપાસ ચોકડીએ ગલ્લાઓ તોડેલ તેમજ લીલીયાના હરિપર ગામે આવેલ આશ્રમમાં બે વાર ચોરી મળી કુલ 25 ચોરીઓ કરેલ હોવાનું જણાવેલ. મજકુર આરોપી તથા તેના સાગરીતો મધ્યપ્રદેશથી સૌરાષ્ટમાં આવી મજુરી કામ કરી રેકી કરી બંધ મકાનો બંધ દુકાનોને ટાર્ગેટ બનાવી ચોરી કરતા હતા.
આ અંગે અમરેલી એલસીબીને આરોપીને ઝડપી પાડવામાં સફળતા મળી હતી આરોપીને આગળની કાર્યવાહી માટે લીલીયા પોલીસને સોંપવામાં આવતા વધુ તપાસ શરુ કરવામાં આવી હતી.
