ઇટલીના તુરીન ખાતે 8થી 15 માર્ચ 2025 દરમિયાન યોજાયેલી સ્પેશિયલ ઓલિમ્પિક્સ વર્લ્ડ વિન્ટર ગેમ્સમાં ગુજરાતની બે મનોદિવ્યાંગ ખેલાડીઓએ ઇતિહાસ રચ્યો છે.
મહેસાણાના આશાબેન ઠાકોર અને દાહોદના પિન્કલબેન ચૌહાણે ફ્લોરબૉલ રમતમાં બ્રોન્ઝ મેડલ જીતીને ગુજરાત અને ભારતનું નામ રોશન કર્યું છે. આ બંને ખેલાડીઓએ ગુજરાત સરકાર દ્વારા 2010થી યોજાતા સ્પેશિયલ ખેલ મહાકુંભમાં છેલ્લાં 15 વર્ષથી ઉત્કૃષ્ટ પ્રદર્શન કરીને આંતરરાષ્ટ્રીય સ્તરે પોતાની ક્ષમતા સાબિત કરી છે. ફ્લોરબૉલ, જે હોકી જેવી ઇન્ડોર રમત છે અને હળવા પ્લાસ્ટિક બૉલ તથા કાર્બન ફાઈબર સ્ટિકથી રમાય છે, તેમાં ભારતીય મહિલા ટીમે આ સફળતા હાંસલ કરી.
ગુજરાતમાં મનોદિવ્યાંગ ખેલાડીઓ માટે સ્પોર્ટ્સ ઑથોરિટી ઑફ ગુજરાત દ્વારા 2010થી સ્પેશિયલ ખેલ મહાકુંભનું આયોજન કરવામાં આવે છે. આ કાર્યક્રમ ‘સ્પેશિયલ ઓલિમ્પિક્સ ભારત-ગુજરાત’ દ્વારા સંચાલિત થાય છે, જે સ્પોર્ટ્સ ઑથોરિટી દ્વારા માન્ય નોડલ સંસ્થા છે. આશાબેન અને પિન્કલબેન આ ખેલ મહાકુંભમાં ભાગ લઈને રાજ્યકક્ષાએ વિજેતા બન્યા હતા,
જેના આધારે તેમની રાષ્ટ્રીય અને આંતરરાષ્ટ્રીય સ્પર્ધાઓ માટે પસંદગી થઈ. આ વર્ષે તુરીનમાં યોજાયેલી ગેમ્સમાં ભારતના 30 એથ્લિટ્સે ભાગ લીધો હતો, જેમાંથી આ બંને ગુજરાતી દીકરીઓએ ફ્લોરબૉલમાં બ્રોન્ઝ મેડલ જીતીને રાજ્યનું ગૌરવ વધાર્યું.
