જમ્મુ-કાશ્મીરના પહેલગામમાં થયેલા આતંકવાદી હુમલા બાદ વડાપ્રધાન નિવાસસ્થાને યોજાયેલી કેબિનેટ કમિટી ઓન સિક્યોરિટી (CCS)ની મહત્વપૂર્ણ બેઠકમાં કેન્દ્ર સરકારે પાકિસ્તાન સામે આકરા પગલાં લીધા છે. વિદેશ મંત્રાલયના પ્રવક્તાએ માહિતી આપતાં જણાવ્યું છે કે પાકિસ્તાન માટે જારી કરવામાં આવેલા તમામ વિઝા તાત્કાલિક અસરથી રદ કરવામાં આવ્યા છે અને અટારી બોર્ડરને પણ કામચલાઉ ધોરણે બંધ કરી દેવામાં આવી છે.
વિદેશ સચિવ વિક્રમ મિસ્રીએ આ અંગે વધુ માહિતી આપતા જણાવ્યું હતું કે ભારતે પાકિસ્તાનના રાજદ્વારીને દેશ છોડી દેવાનો આદેશ આપ્યો છે. એટલું જ નહીં, ભારતમાં હાજર પાકિસ્તાની રાજદૂતને પણ ટૂંક સમયમાં પાછા મોકલવામાં આવશે. આ નિર્ણયોને પાકિસ્તાન દ્વારા પ્રેરિત આતંકવાદ સામે ભારતની એક મજબૂત અને કૂટનીતિક પ્રતિક્રિયા તરીકે જોવામાં આવી રહ્યા છે.
સરકારે પાકિસ્તાની નાગરિકોને તાત્કાલિક ભારત છોડવાનો આદેશ આપ્યો છે. વિદેશ સચિવે સ્પષ્ટપણે જણાવ્યું છે કે સિંધુ જળ સંધિને પણ રદ કરી દેવામાં આવી છે. જે પાકિસ્તાનીઓને વિઝા આપવામાં આવ્યા હતા, તે હવે રદ ગણાશે. હાલમાં જે પાકિસ્તાની નાગરિકો ભારતમાં છે, તેઓને 48 કલાકની અંદર દેશ છોડવા માટે કહેવામાં આવ્યું છે. વિદેશ મંત્રાલયે ભારપૂર્વક જણાવ્યું છે કે ભારત આતંકવાદ સામે ‘ઝીરો ટોલરન્સ’ની નીતિ હેઠળ કામ કરી રહ્યું છે.
બેઠકમાં લેવાયેલા પાંચ મોટા નિર્ણયો નીચે મુજબ છે:
1) 1960ની સિંધુ જળ સંધિને તાત્કાલિક અસરથી સ્થગિત કરવામાં આવશે, જ્યાં સુધી પાકિસ્તાન સરહદ પારના આતંકવાદ માટેના તેના સમર્થનને વિશ્વસનીય અને અફર રીતે છોડી દેતું નથી.
2) અટારી ચેકપોસ્ટને તાત્કાલિક અસરથી બંધ કરી દેવામાં આવશે. જે લોકો માન્ય વિઝા સાથે સરહદ પાર કરી ચૂક્યા છે, તેઓ 1 મે, 2025 પહેલાં તે જ માર્ગે પાછા આવી શકે છે.
3) પાકિસ્તાની નાગરિકોને SAARC વિઝા મુક્તિ યોજના હેઠળ ભારતની મુસાફરી કરવાની મંજૂરી આપવામાં આવશે નહીં. પાકિસ્તાની નાગરિકોને જારી કરાયેલા કોઈપણ SPES વિઝા રદબાતલ ગણાશે. SPES વિઝા હેઠળ હાલમાં ભારતમાં રહેલા કોઈપણ પાકિસ્તાની નાગરિક પાસે ભારત છોડવા માટે 48 કલાકનો સમય છે.
4) નવી દિલ્હીમાં પાકિસ્તાની હાઈ કમિશનમાં સંરક્ષણ, લશ્કરી, નૌકાદળ અને વાયુ સલાહકારોને અનિચ્છનીય વ્યક્તિ જાહેર કરવામાં આવે છે. તેમની પાસે ભારત છોડવા માટે એક અઠવાડિયાનો સમય છે.
5) ભારત ઇસ્લામાબાદ સ્થિત ભારતીય હાઈ કમિશનમાંથી તેના સંરક્ષણ, નૌકાદળના સલાહકારો અને વાયુ સલાહકારને પાછા બોલાવશે અને પાકિસ્તાનના પણ આ તમામ હોદ્દાઓ રદ કરવામાં આવ્યા છે.
