ચાઇનીઝ વિડિઓ સ્ટ્રીમિંગ પ્લેટફોર્મ TikTok ની વેબસાઇટ 5 વર્ષ પછી ભારતમાં ફરી શરૂ થઈ છે, જોકે આ એપ્લિકેશન હજુ પણ ઉપલબ્ધ નથી. હકીકતમાં, 2020 માં, ભારત સરકારે સુરક્ષા કારણોસર TikTok સહિત ઘણી ચાઇનીઝ એપ્લિકેશનો પર પ્રતિબંધ મૂક્યો હતો. આ સાથે, શોપિંગ વેબસાઇટ AliExpress પરથી પણ પ્રતિબંધ હટાવી લેવામાં આવ્યો છે અને તેને ભારતમાં અનબ્લોક કરવામાં આવ્યો છે.
બિઝનેસ ટુડેના અહેવાલ મુજબ, ઘણા વપરાશકર્તાઓ TikTok વેબસાઇટ ખોલી શકે છે, પરંતુ આ એપ્લિકેશન Google Play Store અને Apple App Store પર દેખાતી નથી. TikTok કે તેની પેરેન્ટ કંપની ByteDance એ ભારતમાં એપ્લિકેશન પરત કરવા અંગે કોઈ સત્તાવાર નિવેદન આપ્યું નથી
જૂન 2020 માં જ્યારે ગાલવાન ખીણમાં ભારત-ચીન તણાવ ચરમસીમાએ હતો ત્યારે TikTok પર પ્રતિબંધ મૂકવામાં આવ્યો હતો. ભારત સરકારે 59 મોબાઇલ એપ્લિકેશનોને રાષ્ટ્રીય સુરક્ષા માટે ખતરો ગણાવીને પ્રતિબંધ મૂક્યો હતો. આ યાદીમાં TikTok, ShareIt, UC બ્રાઉઝર, UC News અને ઘણી લોકપ્રિય એપ્લિકેશનોનો સમાવેશ થાય છે. આ પ્રતિબંધ ઇન્ફોર્મેશન ટેકનોલોજી એક્ટ 2000 ની કલમ 69A હેઠળ લાદવામાં આવ્યો હતો.
TikTok વેબસાઇટનું પુનરાગમન એવા સમયે થયું છે જ્યારે ભારત-ચીન સંબંધોમાં નરમાઈ જોવા મળી રહી છે. તાજેતરમાં, પીએમ મોદી અને ચીનના વિદેશ મંત્રી વાંગ યી વચ્ચેની બેઠકમાં, સરહદ પર શાંતિ જાળવવા, સરહદ વેપાર ખોલવા અને રોકાણ વધારવા જેવા મુદ્દાઓ પર ચર્ચા કરવામાં આવી હતી. જોકે, ભારત સરકારે હજુ સુધી એપ્લિકેશન પરનો પ્રતિબંધ હટાવવા માટે કોઈ સત્તાવાર જાહેરાત કરી નથી.
