ભારતીય મહિલા હોકી ટીમે એશિયા કપ 2025 માં શાનદાર શરૂઆત કરી છે. કાલે રમાયેલી પૂલ બીની મેચમાં ભારતે થાઈલેન્ડને 11-0 ના વિશાળ માર્જિનથી હરાવીને એશિયા કપ જીતવાનો પોતાના ઇરાદા સ્પષ્ટ કરી દીધા છે.
આ મેચમાં ભારતીય ખેલાડીઓએ એક પછી એક ગોલ કરીને વિરોધી ટીમ પર સંપૂર્ણ પ્રભુત્વ જમાવ્યું હતું. ભારત તરફથી ઉદિતા દુહાન અને બ્યુટી ડુંગ ડુંગ એ બે-બે ગોલ કર્યા. આ ઉપરાંત, મુમતાઝ ખાન, સંગીતા કુમારી, નવનીત કૌર, લાલરેમસિયામી, થૌડમ સુમન દેવી, શર્મિલા દેવી અને રૂતાજા દાદાસો પિસલે પણ ગોલ ફટકાર્યા હતા. ભારતીય ટીમ હાફ ટાઈમ સુધીમાં જ 5-0ની લીડ સાથે મજબૂત સ્થિતિમાં હતી.
ભારતનું લક્ષ્ય વર્લ્ડ કપ ક્વોલિફિકેશન
આ ટુર્નામેન્ટમાં 8 ટીમો ભાગ લઈ રહી છે. જેમાંથી ટોચની 2 ટીમો સુપર 4 સ્ટેજ માટે ક્વોલિફાય થશે, અને સુપર 4 માંથી શ્રેષ્ઠ 2 ટીમો 14 સપ્ટેમ્બરે ફાઇનલ રમશે. આ એશિયા કપ જીતનાર ટીમ આગામી વર્ષે બેલ્જિયમ અને નેધરલેન્ડ્સમાં યોજાનારા મહિલા વર્લ્ડ કપ માટે સીધી ક્વોલિફાય થશે. ભારતીય ટીમ આ ટુર્નામેન્ટમાં પોતાની અનુભવી ગોલકીપર સવિતા પૂનિયા અને સ્ટાર ડ્રેગ ફ્લિકર દીપિકા વિના જ રમી રહી છે, કારણ કે બંને ખેલાડીઓ ઈજાગ્રસ્ત છે.
આ જીત સાથે, ભારતે ટૂર્નામેન્ટમાં મજબૂત શરૂઆત કરી છે. ભારત હવે શનિવારે (6 સપ્ટેમ્બર) જાપાન સામે ટકરાશે, અને ત્યારબાદ પૂલ સ્ટેજની છેલ્લી મેચમાં 8 સપ્ટેમ્બરે સિંગાપોરનો સામનો કરશે.
