ભારતીય સિનેમાના ‘એક્શન કિંગ’ સની દેઓલ ફરી એકવાર પાકિસ્તાન વિરોધી મજબૂત કન્ટેન્ટ સાથે ‘બોર્ડર 2’ લઈને આવી રહ્યા છે, પરંતુ આ ફિલ્મ રીલીઝ થાય તે પહેલા જ આંતરરાષ્ટ્રીય સ્તરે મોટો વિવાદ ઊભો થયો છે. સની પાજીની ફિલ્મોમાં જે રીતે પાકિસ્તાનનો પર્દાફાશ કરવામાં આવે છે, તેનાથી ગલ્ફ દેશો અને કહેવાતા ‘ઇસ્લામિક નાટો દેશો’માં દહેશતનો માહોલ છે,
મધ્ય પૂર્વના મુખ્ય દેશોએ આ ફિલ્મની રીલીઝ પર સંપૂર્ણ પ્રતિબંધ મૂકી દીધો છે.
બોલિવૂડ હંગામાના અહેવાલ મુજબ, ‘બોર્ડર 2’ બહેરીન, કુવૈત, ઓમાન, કતાર, સાઉદી અરેબિયા અને સંયુક્ત આરબ અમીરાત (UAE) માં રીલીઝ કરવામાં આવશે નહીં. આ દેશોના સેન્સર બોર્ડનું માનવું છે કે ફિલ્મમાં રહેલી સામગ્રી પાકિસ્તાન વિરોધી છે અને તેનાથી પ્રાદેશિક લાગણીઓ દુભાઈ શકે છે. નિર્માતાઓએ આ દેશોમાં ફિલ્મને લીલી ઝંડી અપાવવા માટે ઘણા પ્રયાસો કર્યા, પરંતુ અંતે તેમને નિષ્ફળતા મળી છે.
ગલ્ફ દેશો માટે બોલિવૂડ ફિલ્મોને સેન્સર કરવી એ કંઈ નવું નથી, પરંતુ સની દેઓલની ફિલ્મોનો ડર એક અલગ જ સ્તરે છે. અગાઉ ‘ધુરંધર’ પર પણ આ જ રીતે પ્રતિબંધ લાદવામાં આવ્યો હતો. આ સિવાય હૃતિક રોશનની ‘ફાઈટર’, અક્ષય કુમારની ‘સ્કાય ફોર્સ’ અને જોન અબ્રાહમની ‘ધ ડિપ્લોમેટ’ ને પણ આ દેશોમાં પ્રતિબંધનો સામનો કરવો પડ્યો છે. સની દેઓલની વર્ષ ૨૦૨૩ ની બ્લોકબસ્ટર ‘ગદર 2’ ને પણ પાકિસ્તાનમાં પ્રતિબંધિત કરવામાં આવી હતી.
જોકે વિદેશી બજારમાં પ્રતિબંધથી નિર્માતાઓને આર્થિક નુકસાન થઈ શકે છે, પરંતુ ભારતમાં આ ફિલ્મને લઈને જબરદસ્ત ક્રેઝ જોવા મળી રહ્યો છે. ૨૩ જાન્યુઆરીએ રીલીઝ થઈ રહેલી આ ફિલ્મમાં સની દેઓલની સાથે વરુણ ધવન પણ મુખ્ય ભૂમિકામાં છે. સેન્સર બોર્ડે ફિલ્મને પહેલા જ ગ્રીન સિગ્નલ આપી દીધું છે અને હવે ભારતીય દર્શકો સની પાજીની એ ઐતિહાસિક ગર્જના સાંભળવા માટે આતુર છે. વિશ્લેષકોનું માનવું છે કે વિદેશમાં પ્રતિબંધ લાગવાથી ફિલ્મના હાઈપમાં ઉલટાનો વધારો થયો છે, જે સ્થાનિક બોક્સ ઓફિસ પર રેકોર્ડબ્રેક કમાણીમાં પરિણમી શકે છે.
