ભારતીય શેરબજારમાં જોવા મળેલી ઐતિહાસિક તેજી બાદ હવે આજના ટ્રેડિંગ સત્ર પર સૌની નજર છે. ખાસ કરીને ભારત અને અમેરિકા વચ્ચે થયેલા વેપાર કરારને કારણે બજારમાં ભારે ઉત્સાહ છે. આ દરમિયાન ઘણી મોટી કંપનીઓએ તેમના ત્રીજા ક્વાર્ટરના (Q3) પરિણામો જાહેર કર્યા છે, જેની સીધી અસર બુધવારે તેમના શેરના ભાવ પર જોવા મળી શકે છે.
પરિણામો બાદ આ શેરોમાં હલચલ રહેશે:
પિડિલાઇટ ઇન્ડસ્ટ્રીઝ: કંપનીનો ચોખ્ખો નફો અંદાજ કરતા વધુ 11.9% વધીને ₹623 કરોડ થયો છે. મજબૂત માર્જિનને કારણે આ શેરમાં તેજીની શક્યતા છે.
મેનકાઇન્ડ ફાર્મા: નફામાં 7.5% અને આવકમાં 11.5% ના વધારા સાથે ફાર્મા સેક્ટરનો આ શેર તેજી બતાવી શકે છે.
આદિત્ય બિરલા કેપિટલ: કંપનીના નફામાં 41% નો જંગી ઉછાળો જોવા મળ્યો છે, જે રોકાણકારોને આકર્ષી શકે છે.
V2 રિટેલ: નફામાં 99% થી વધુનો ધરખમ વધારો નોંધાયો છે, જેનાથી રિટેલ સેક્ટરના આ સ્ટોકમાં રોકેટ ગતિ જોવા મળી શકે છે.
ચિંતાજનક પરિણામો ધરાવતા શેરો:
જ્યાં એકતરફ તેજીનો માહોલ છે, ત્યાં બજાજ ફાઇનાન્સ અને જેકે લક્ષ્મી સિમેન્ટના નફામાં ઘટાડો નોંધાયો છે. બજાજ ફાઇનાન્સનો નફો અંદાજ કરતા ઓછો રહેતા આ શેરમાં દબાણ જોવા મળી શકે છે. તેવી જ રીતે, કાસ્ટ્રોલ ઇન્ડિયા અને ફર્સ્ટસોર્સ ના નફામાં પણ ઘટાડો થયો છે, જે રોકાણકારો માટે ચિંતાનો વિષય બની શકે છે.
NBCC માટે સારા સમાચાર: સરકારી કંપની NBCC એ અંદાજે ₹277 કરોડના નવા ઓર્ડર મેળવ્યા છે. કન્સ્ટ્રક્શન અને ઈન્ફ્રાસ્ટ્રક્ચર સેક્ટરમાં તેજી વચ્ચે આ નવા ઓર્ડર શેરના ભાવને વેગ આપી શકે છે. બજારના નિષ્ણાતો માને છે કે ટ્રેડ ડીલના કારણે આખું અઠવાડિયું બજારમાં પોઝિટિવ સેન્ટિમેન્ટ જળવાઈ રહેશે.
