વોટ્સએપનું સર્વર દુનિયાભરમાં લગભગ પોણો કલાક સુધી ડાઉન રહ્યું. એવી જ હાલત ઈન્સ્ટાગ્રામની પણ રહી. ફેસબુક પણ બધી જગ્યાએ ડાઉન રહ્યું. ત્રણે એક સાથે ડાઉન થયા. ભારતીય સમય મુજબ, શુક્રવારે રાત્રે ૧૧ કલાકની આસપાસ ત્રણેય સાઈટના સર્વર ડાઉન થઈ ગયા. યૂઝર્સ તેની એપ કે વેબ સર્વિસનો ઉપયોગ નહોતા કરી શકતા.
આખરે મોડી રાત્રે ૧૧.૪૫ કલાકે ત્રણેયની સેવાઓ ફરી શરૂ થઈ હતી. ખાસ વાત એ છે કે, ત્રણેય સોશિયલ મીડિયા પ્લેટફોર્મ ફેસબુક ઈંકના છે, જેના માલિક માર્ક ઝુકરબર્ગ છે. વોટ્સએપ, ફેસબુક અને ઈન્સ્ટાગ્રામ એકસાથે ડાઉન થયા બાદ ટ્વીટર પર માર્ક ઝુકરબર્ગ ટ્રેન્ડ કરવા લાગ્યા. તે ઉપરાંત ફેસબુક ડાઉન, વોટ્સએપ ડાઉન અને ઈન્સ્ટાગ્રામ ડાઉન પણ ટ્વિટર પર ટ્રેન્ડ કરવા લાગ્યું.
લોકોએ પોતાને પડેલી તકલીફો વિશે ટ્વિટર પર જણાવ્યું હતું. ફેસબુક મેસેન્જર પર મેસેજ નહોતા જઈ રહ્યા. વોટ્સેપ પર પણ મેસેજ નહોતા જતા ઈન્સ્ટાગ્રામ પર પણ એવી જ હાલત હતી. જોકે, એપ્સ ઓપન થઈ રહ્યા હતા. ફેસબુક અને ઈન્સ્ટાગ્રામની ન્યૂઝ ફીડ રિફ્રેશ નહોતી થઈ રહી.
ઉલ્લેખનીય છે કે, આ પ્રકારે સર્વિસીઝ ડાઉન થવાથી સાઈબર ક્રાઈમનો ખતરો પણ વધે છે. એટલું જ નહીં, સાઈબર એટેકના કારણે પણ સર્વિસીઝ ડાઉન થતી હોય છે. આ વખતે શું થયું છે તે હજુ સ્પષ્ટ થયું નથી. આ પહેલા પણ દ્યણી વખત વોટ્સએપ અને ઈન્સ્ટાગ્રામ ડાઉન થયા છે. સામાન્ય રીતે કંપની તે અંગે સ્ટેટમેન્ટ બહાર પાડે છે, પરંતુ સમસ્યાનું કારણ જણાવતી નથી હોતી.
