હરિયાણાની જીંદની સિવિલ હોસ્પિટલમાંથી ચોરીનો ચોંકાવનારો કિસ્સો સામે આવ્યો છે, જયાં એક ચોરે ગઈરાત્રે રાત્રે ૧૨ વાગ્યે કોરોના રસીના અનેક ડોઝની ચોરી કરી હતી. પરંતુ ગુરુવારે ચોર સિવિલ લાઇન પોલીસ સ્ટેશનની બહાર એક ચા વેચનારને બધી દવાઓ પરત આપી ગયો અને સાથે એક લેટર પણ છોડી ગયો હતો. જેમાં લખ્યું હતું – માફ કરશો, મને ખબર નહોતી કે આ કોરોના રસી છે.
જીંદના ડીએસપી જીતેન્દ્ર ખટકડે માહિતી આપી હતી કે ગઈકાલે રાત્રે ૧૨ વાગ્યે સિવિલ હોસ્પિટલમાંથી કોરોનાના અનેક ડોઝ ચોરાયા હતા. પરંતુ ગુરુવારે દિવસના ૧૨ વાગ્યે ચોર સિવિલ લાઇન પોલીસ સ્ટેશનની બહાર ચાની દુકાન પર બેઠેલા વૃદ્ઘ સુધી પહોંચ્યો હતો અને તેને એક થેલી આપી હતી અને કહ્યું હતું કે આ પોલીસ સ્ટેશનના ઓફિસરનું ભોજન છે. થેલી સોંપીને ચોર ત્યાંથી જતો રહ્યો હતો.
વૃદ્ઘ વ્યકિત બેગ લઇને પોલીસ સ્ટેશન પહોંચ્યો. જયારે ત્યાં હાજર પોલીસકર્મીઓએ થેલી ખોલી ત્યારે તેમાંથી કોવિશિલ્ડના ૧૮૨ ડોઝ અને કોવાકિસનના ૪૪૦ ડોઝ મળી આવ્યા હતા. આ સાથે એક કાગળ પર હાથ વડે લખેલી એક નોંધ પણ મળી હતી. જેમાં લખ્યું હતું કે માફ કરશો, મને ખબર નહોતી કે આ કોરોનાની રસી છે.
