રાજ્યમાં આજે અમદાવાદ, ગાંધીનગર સહિત અનેક શહેરોમાં વાળદછાયું વાતાવરણ જોવા મળી રહ્યું છે. જ્યારે અમદાવાદમાં શનિવારે રાતે મોટાભાગના વિસ્તારોમાં ભારે પવન સાથે વરસાદ પડ્યો હતો. ત્યારે હવે આગામી 3 કલાકમાં અમદાવાદ, ગાંધીનગર, પાટણ અને બનાસકાંઠામાં વરસાદ પડવાની આગાહી કરવામાં આવી છે.
બનાસકાંઠા, ભાવનગર, આણંદ અને અમરેલીમાં વરસાદ
મળતી માહિતી મુજબ, રાજ્યમાં વરસાદી ટર્ફ પસાર થતા વરસાદ પડવાની આગાહી હવામાન વિભાગ દ્વારા કરવામાં આવી છે. આગામી બે દિવસ સુધી રાજ્યના વિવિધ જિલ્લાઓમાં ભારે પવન સાથે વરસાદ પડવાની શક્યતાઓ છે. બનાસકાંઠા, ભાવનગર, આણંદ અને અમરેલીમાં વરસાદ પડી શકે છે. જ્યારે અમદાવાદની વાત કરીએ તો થન્ડર સ્ટોર્મ એક્ટિવિટીની શક્યતાઓ સર્જાઈ રહી છે. દરમિયાન ઉત્તર ગુજરાત, સૌરાષ્ટ્ર અને કચ્છમાં 30-40 કિમીની ઝડપે પવન ફૂંકાઈ શકે છે. માછીમારોને દરિયો ન ખેડવા સૂચના આપવામાં આવી છે.
અમદાવાદમાં 7 અને 8 જૂનના રોજ ગરમીનું યલો એલર્ટ
બીજી તરફ અમદાવાદમાં 7 અને 8 જૂનના રોજ ગરમીનું યલો એલર્ટ છે. જ્યારે વિવિધ જિલ્લાઓમાં 7થી 11 જૂન દરમિયાન વરસાદ પડી શકે છે. મીડિયા અહેવાલ મુજબ, 5 જૂને દક્ષિણ-પૂર્વ અરબી સમુદ્રમાં સાયક્લોનિક સર્ક્યુલેશન બનશે. આથી 7 -11 જૂન દરમિયાન વાવાઝોડા સાથે ભારે વરસાદ પડવાની આગાહી કરવામાં આવી છે.
