અમદાવાદ સહિત આખા દેશમાં અનલોક-1 અમલમાં છે. તેમાં લોકોને પોતાના કામથી બહાર નિકળવાની છૂટ આપવામાં આવી છે. તેની સાથે સરકારે દિશા-નિર્દેશોનું પાલન કરવાનું પણ જણાવ્યુ છે. જેમ કે સોશિયલ ડિસ્ટન્સિંગ, માસ્ક પહેર્વુ વગેરે. નિયમોનું પાલન ના કરાનાર પાસેથી દંડ વસૂલવાની જોગવાઈ પણ છે. ત્યારે અમદાવાદ પોલીસે છેલ્લા પાંચ દિવસમાં માસ્ક પહેર્યા વગર 13 હજારથી વધારે લોકો ઝડપી પાડ્યા છે. તેમની પાસેથી રૂપિયા 27 લાખથી પણ વધુ રકમ દંડ પેટે વસુલવામાં આવી છે.
અમદાવાદ પોલીસે છેલ્લા 5 દિવસ દરમિયાન માસ્ક પહેર્યા વિના ફરતા 13,581 લોકો વિરુદ્ધ કેસ દાખલ કર્યો છે. 19 થી 23 જૂન સુધીના 5 દિવસ દરમિયાન આવા લોકો પાસેથી અત્યાર સુધી 27 લાખથી પણ વધુ રકમ દંડ પેટે વસુલવામાં આવી છે.
પોલીસ પાસેથી પ્રાપ્ત આંકડા પ્રમાણે જોઈએ તો, 19 જૂનના રોજ 2,088 લોકો પાસેથી 4.17 લાખ, 20 જૂનના રોજ 3,190 લોકો પાસેથી રૂપિયા 6.38 લાખ, 21 જૂનના રોજ 3,198 લોકો પાસેથી રૂપિયા 6.39 લાખ, 22 જૂનના રોજ 3,129 લોકો પાસેથી રૂપિયા 6.25 લાખ અને 23 જૂનના રોજ 1,976 લોકો પાસેથી રૂપિયા 3.95 લાખનો દંડ વસૂલવામાં આવ્યો છે.
