સરસપુરમાં એક શિક્ષકે વિદ્યાર્થિનીને ભણાવવાના બહાને છેડતી કરી ગુરુ વિદ્યાર્થીના સંબંધ પર કીચડ ઉચાડતો કિસ્સો સામે આવ્યો છે.
વિદ્યાર્થિનીના પરિવારજનોને ઘટનાની જાણ થતાં તેઓ શહેરકોટડા પોલીસ સ્ટેશન ફરિયાદ નોંધાવી હતી. પોલીસ દ્વારા હકીકત જાણી આરોપી સામે ફરિયાદ નોંધી તેની ધરપકડ કરી. આ શિક્ષકે અન્ય કોઇ સાથે આવું ગંદુકામ કર્યું છે કે કેમ તે બાબતને લઇને પણ પોલીસે તપાસ શરૂ કરી છે.
પોલીસ કસ્ટડીમાં આવેલા આરોપી શિક્ષકનું નામ અજય સોલંકી છે. જેને ગુરુ અને વિદ્યાર્થિનીના સંબંધને લાંછન લાગે તેવું કૃત્ય કરતા તે જેલના સળિયા પાછળ ધકેલાયો છે. સરસપુર વિસ્તારમાં રહેતી એક વિદ્યાર્થિની ધોરણ 12માં અભ્યાસ કરે છે અને છેલ્લા 3 વર્ષથી અજય સોલંકી પાસે ટ્યુશન ક્લાસમાં જતી હતી. 9 જાન્યુઆરીના રોજ આરોપી અજય સોલંકીએ અભ્યાસના નામે સગીરાને રોકી હતી. અને ત્યાર બાદ સગીરા સાથે શારીરિક છેડછાડ કરી હતી.
આ અંગે સગીરાએ પરિવારને શિક્ષકની કરતૂત જણાવતા પરિવારે શહેરકોટડા પોલીસ સ્ટેશનમાં ફરિયાદ નોંધાવતા પોલીસે આરોપીની ધરપકડ કરી વધુ કાર્યવાહી હાથધરી છે.
