અમદાવાદમાં ભાજપ દ્વારા લોકસભાની ચૂંટણીને લઈને અત્યારથી જ તૈયારીઓ તેજ બની છે. આજે વિવિધ મોરચાની સંયુક્ત બેઠકનું આયોજન ભાજપ રાષ્ટ્રીય મહામંત્રી વિનોદ તાવડે તેમજ મહામંત્રી રત્નાકરની ઉપસ્થિતિમાં કરવામાં આવશે.
અમદાવાદ બોડકદેવ ખાતે પંડિત દિનદયાળ હોલ ખાતે આ બેઠકનું આયોજન કરવામાં આવ્યું છે. યુવા મોરચા, મહિલા મોરચા સહિતના વિવિધ વિભાગોની બેઠકનું આયોજન કરવામાં આવ્યું છે.
સંયુક્ત કારોબારી બેઠકની અંદર મહત્વના મુદ્દાઓને ધ્યાનમાં રાખીને ચર્ચા કરવામાં આવશે. ખાસ કરીને કેન્દ્ર સરકારના કામોને તેમની યોજનાઓને છેવાડાના લોકો સુધી પહોંચાડવા માટે આયોજન કરવામાં આવશે. આ સંયુક્ત બેઠકની અંદર ભાજપ રાષ્ટ્રીય મહામંત્રી વિનોદ તાવડે તેમજ મહામંત્રી રત્નાકર હાજર રહેશે. જેમની અધ્યક્ષતામાં આ બેઠકનું આયોજન કરવામાં આવ્યું છે.
ભાજપ દ્વારા જે રીતે દેશભરમાં લોકસભાની તૈયારીઓ તેજ કરવામાં આવી છે તેવી જ રીતે રાજ્ય લેવલે સંગઠનને મહત્વની કામગિરી સોંપવામાં આવી રહી છે. કેટલાક ગુજરાતના દિગ્ગજ નેતાઓને પણ આ જવાબદારી સોંપવામાં આવી રહી છે. નિતીન પટેલને ઉત્તર પ્રદેશની તો રુપાણીને દિલ્હીની જવાબદારી સોંપવામાં આવી છે, આ સાથે સરકાર અને સંગઠન સાથે મળીને લોકસભામાં મોટી જીતના પ્રયત્નો કરશે. જે માટે વિવિધ કાર્યક્રમો આગામી સમયમાં સીઆર પાટીલ અને સીએમની આગેવાનીમાં યોજવામાં આવશે.
