શહેરના ઐતિહાસિક અને ગીચ દરિયાપુર વિસ્તારમાં આવેલું અને નિયમોના ઉલ્લંઘન માટે જાણીતું ‘મનપસંદ જીમખાના’ આખરે અમદાવાદ મ્યુનિસિપલ કોર્પોરેશન (AMC)ના એસ્ટેટ વિભાગની રડારમાં આવી ગયું છે. મધ્ય ઝોનના ડેપ્યુટી ટાઉન ડેવલપમેન્ટ ઓફિસર (DTDO)ના કડક આદેશ બાદ દરિયાપુર પોલીસ સ્ટેશનના કાફલા સાથે પહોંચેલા કોર્પોરેશનના અધિકારીઓએ આ સમગ્ર પરિસરને સીલ મારી દઈ આખા વિસ્તારના બિનઅધિકૃત બાંધકામકર્તાઓમાં ફફડાટ વ્યાપી દીધો છે.
ઘટનાની રસપ્રદ વિગતો મુજબ, દરિયાપુરના વોર્ડ નંબર ૨૧માં આવેલી આ મિલકત માટે છેક ૧૯૬૨ના વર્ષમાં પ્લાન મંજૂર કરવામાં આવ્યો હતો. તત્કાલીન પરવાનગી મુજબ ગ્રાઉન્ડ ફ્લોર પર જ માત્ર કોમર્શિયલ વપરાશ કરવાની છૂટ હતી, જ્યારે પ્રથમ અને બીજા માળને માત્ર અને માત્ર રહેણાંક હેતુ માટે અનામત રાખવાના હતા. પરંતુ નિયમોની પરવા કર્યા વગર સંચાલકોએ આખેઆખી ઈમારતને કોમર્શિયલ હેતુમાં ફેરવી નાખી હતી અને તેમાં બિનઅધિકૃત રીતે ‘મનપસંદ જીમખાના’ ચલાવવામાં આવી રહ્યું હતું.
તંત્ર દ્વારા આ સ્થળે આ અગાઉ પણ કડક પગલાં ભરવામાં આવ્યા હતા. અગાઉ ૨૦ માર્ચ, ૨૦૨૫ના રોજ તંત્રએ આ જ મિલકત પર કાર્યવાહી કરીને ત્રીજા માળ પર ખડકી દેવાયેલું બિનઅધિકૃત બાંધકામ દૂર કર્યું હતું. તેમ છતાં, સંચાલકો દ્વારા બિનઅધિકૃત વપરાશ ચાલુ રાખવામાં આવ્યો હતો. આખરે AMCએ ચુસ્ત પોલીસ બંદોબસ્ત વચ્ચે આખું જીમખાનું સીલ કરી તેનો વપરાશ કાયમ માટે બંધ કરાવી દીધો છે.
AMCએ આ કડક કાર્યવાહી સાથે સ્પષ્ટ અને આકરી ચેતવણી પણ જારી કરી દીધી છે કે, જો કોઈ પણ વ્યક્તિ આ સીલનો ભંગ કરશે કે ગેરકાયદે પ્રવેશ કરવાનો પ્રયાસ કરશે તો તેની સામે ભારતીય ન્યાય સંહિતા (BNS)ની કલમ-૨૨૩ હેઠળ કાયદેસરની પોલીસ કાર્યવાહી હાથ ધરાશે. કોર્પોરેશનની આ આક્રમક ઝુંબેશથી ગેરકાયદે વપરાશ કરતા તત્વોમાં ભારે ખળભળાટ મચી ગયો છે.
